පහුගිය දවස් කීපය තිස්සෙ ම බුකියෙ කතා බහ ලිච්ටෙන්ස්ටයින් රාජ්‍යය ගැන. ලිච්ටෙන්ස්ටයින් රාජ්‍යය සමග තානාපති සබඳතා ඇති කර ගැනීම සම්බන්ධ කැබිනට් තීරණය ගැන.
මම නම් ලිච්ටෙන්ස්ටයින් රාජ්‍ය සමග සම්බන්ධකම් ඇති කරගෙන දැන් අවුරුදු කීපයක්..!
ලිච්ටෙන්ස්ටයින් රාජ්‍ය ස්විට්සර්ලන්තයත්, ඔස්ටි්‍රයාවත් අතර පිහිටා තියෙන කඳුකර කුඩා බිම්කඩක්. රටේ එක් කෙළවරක ඉඳන් අනෙක් කෙළවරට කිලෝ මීටර 24 යි.
මුළු රටේ ම ප්‍රමාණය වර්ග කිලෝමීටර 160 ක්. ජනගහනය හතලිස් දාහක් විතර. බොහොම පෝසත් රටක්. ලෝකයේ ඕනෑ ම රටක සමාගමක් ලිච්ටෙන්ස්ටයින් රාජ්‍යයේ ලියාපදිංචි කරන්න පහසුකම් සලසා තියෙනවා.
බදු ගෙවන්නන්ට තව්තිසාවක් නිසා ලෝක ප්‍රසිද්ධ හා අප්‍රසිද්ධ වෙළඳ සමාගම් දහස් ගණනක් එහි ලියාපදිංචි කරලා තියෙනවා.
ෆඩුට්ස් අගනුවර ඇති ලිච්ටෙන්ස්ටයින් මාළිගය 1840 ගණන් වල දී ඉදි කරන ලද්දක්. ඉපැරණි කලාකෘති හා වෙනත් ඓතිහාසික සිහිවටන පිරි නවීන ගෘහනිර්මාණ ලක්‍ෂණයෙන් පෝෂිත ජාතික කෞතුකාගාරය ඉදිකෙරුණේ 2000 වසරේ දී.හරි ම සුන්දර, පිරිසිදු රටක්.
යන්න හිතෙන රටක්. ඉන්න හිතෙන රටක්.මට නම් ලිච්ටෙන්ස්ටයින් රාජ්‍යයේ ලියාපදිංචි කළ සමාගම් නෑ. ඒත් හිත බැඳුණු බැල්ලියක් ඉන්නවා. හැබැයි ඒකිත් කෞතුකාගාරයේ පුළුන් පුරවපු එකියක්….!
(සමන් අතාවුදහෙට්ටිගේ ෆේස් බුක් පිටුවෙනි )
