කොවිඩ් 19 වෛරසය ආසාදනය වී ඇති පුද්ගලයින් සංඛ්‍යාව ගත් කල ඉන්දියාවේ මූල්‍ය අගනගරය වන මුම්බායි හි තත්වය චීනයේ වූහාන් නගරයේ පැවැති තත්ත්වයට වඩා බරපතල වී ඇත.
ඊයේ මුම්බායි නගරයේ ආසාදිතයන්ගේ ගණන 55000 ඉක්මවා ගියේය.
මෙම ප්‍රවෘත්තිය සැල වන්නේ ඉන්දියාව පුරා තහවුරු වී සිටින මුළු ආසාදිතයන්ගේ සංඛ්‍යාව ලක්ෂ 3 පසු කර ඇති බව වාර්තා වන අතරතුරයි.
වාර්තා වන සමස්ත මරණ සංඛ්‍යාව 8,890 ක්.
ඉන්දියාවේ ආසාදිතයන් ලක්ෂය ඉක්මවා ගොස් තිබුණේ පළමු ආසාදිතයා වාර්තා වී දින 64 ක් තුළ වන අතර දෙසතියක් තුළ ආසාදිතයන් ලක්ෂ දෙක ඉක්මවා ගොස් තිබුණි.
ඉන්දියාවේ ආසාදිතයන් ලක්ෂ තුනේ සීමාව පසුකරන්නේ දින 10 ක් වැනි කෙටි කාලයක් තුළ වීම විශේෂත්වයක්.
ඉන්දියානු බලධාරීන් පවසන්නේ ලබන ජූලි මාසය අවසන් වන විට මුළු ඉන්දියාව පුරා කොරෝනා ආසාදිතයන් ලක්ෂ පහක් පමණ සිටිනු ඇතැයි අපේක්ෂා කළ හැකි බවයි.
එවන් පසුබිමක එරට ජනතාව රංචු ගැසෙමින් දුරස්ථ සම්මතයන් බිඳ හෙලමින් අපරික්ෂාකාරී අන්දමින් කටයුතු කරන ආකාරය එරට මාධ්‍ය මගින් නිතර අවධානයට ලක්කරන්නේ අනාගතයේ උද්ගත වියහැකි භයානක අනතුරක සේයා මතු කරමින්.
මේ අතර කොවිඩ් ව්‍යාප්තිය හමුවේ ඉන්දියාවේ රෝහල්වල අඳුරු පැතිකඩක් අනාවරණය කරමින් ආසාදිතයන් සහ මළසිරුරු එකම ස්ථානයක තබා ඇති අයුරු දැක්වෙන දර්ශන ද මාධ්‍යයට නිකුත් වී තිබේ.
මේ අතර දෑත් සිප ගැනීමෙන් රෝග සුව කිරීමේ විස්මිත බලයක් තමන් සතුව ඇති බවට පෙනී සිටි මධ්‍ය ප්‍රදේශ් ප්‍රාන්තයේ බාබා නම් පුද්ගලෙයෙකු ඉකුත් 4 වැනිදා කොවිඩ් වෛරසයෙන් මියගොස් තිබුණි.
ඔහු සමග සබඳතා පැවැත්වූ 50කට අධික පිරිසක් සොයාගෙන ඇති අතර ඉන්19 දෙනෙකුට වෛරසය ආසාදනය වී ඇතැයි මේ වනවිට තහවුරු වී තිබේ.
