ඊයේ (16) සිනෆෝම් එන්නත කළමුල්ල උතුර හා කළමුල්ල දකුණ ග්‍රාම සේවා වසම් දෙකේ ජනතාවට ලබා දීම සිදු වුණා.
පසුගිය දිනවල ගම් වල දිගු පෝලිම්වල පැය ගනණ් මහජනයා රස්තියාදු කරමින් නිරෝධායන නීති කඩමින්, රෝගය තවත් ව්‍යාප්තවීමට හේතුවන පරිදි හා ප්‍රාදේශීය දේශපාලකයින්ගේ මැදිහත්වීම් වලින් ජනතාව ප්‍රකෝප කරමින් ගැටුම් ඇති කරමින් සිදු කළ එන්නත්කරණය අපේ සමාජ අවුල ප්‍රදර්ශනය කළා.
ප්‍රචාරකවාදි දේශපාලනය හා අනුග්‍රහක දේශපාලනය ප්‍රදර්ශනය කළා.
නමුත් කළමුල්ලේ සිදුවූ එන්නත්කරනය 99% ක් ම ඒ දුබලතා මඟ හරවාගත් එකක් වුණා.
එහි ගෞරවය පාර්ශව තුනකට හිමිවිය යුතුයි. පළමු පිරිස තමයි වසමට යම් පමණකට හෝ ප්‍රමාණවත් එන්නත් සංඛ්‍යාවක් සම්පාදනය කරගෙන ආ මහජන සෞඛ්‍ය පරීක්ෂක තාරක මහතාත් ජනතාවට නිසි ක්‍රමවේදයක් ඉදිරිපත් කරමින් කරුණු පැහැදිලි කළ වෛද්‍ය ප්‍රදීප් ඇතුළු කළුතර සෞඛ්‍ය විද්‍යාතනයේ සෞඛ්‍ය කාර්ය මණ්ඩලය.
දෙවැනි පිරිස තමයි එන්නත්කරණය සිදුවූ සාන්ත මරියා දෙව් මැදුර අවට දේශපාලනයෙන් තොර ව ප්‍රජා නායකත්වයක් අරගෙන තුන්ඩු නිකුත් කර ක්‍රමවේදයක් සැකසු පිරිස. ඔවුන් මුළු කාර්යයම හොඳින් මෙහෙයවීමට උපකාර කළා.
තුන්වෙනි පිරිස සුළු අඩුපාඩු තිබුනත් සමස්තයක් ලෙස ඒ වැඩි පිලිවෙලට අනුගත වු ජනතාව.
අපේ සෞඛ්‍ය සේවාව එන්නත්කරනය අතින් ආසියාවේ දියුණු සෞඛ්‍ය සේවාවක් කෝවිඩ් තුළ එය අවුලක් ලෙස පේන්නේම දේශපාලන අයුතු බලපෑම් නිසා.
කෝවිඩ් එන්නත් ප්‍රමාණවත්ව සපයා ගන්නට වැඩි පිළිවෙලක් රජයට තිබුණා නම්, ඉතා පහුසවෙන් ඡන්ද හිමි නාම ලේඛනය අනුව ජනතාවට වේලාවක් දී කිසිදු තද බදයක් නැතිව හරිම විනයවත්ව මේ වැඩේ කරන්න පුළුවන්. පාක්ෂික මනස් ඇති දේශපාලකයින්ට ඒ වැඩේ බැරිවුනාට ඔවුන් හැකි තරම් ඉවත් වුනාම ගමේ ප්‍රජාවගෙන් එවැනි වැඩක් හොඳින් සංවිධානය කරගන්න දේශපාලන වාසි නොබලන ඕනෑ තරම් ප්‍රජා නායකයින් ඉන්නවා.
මේ සා පල්ලි, පන්සල්, කෝවිල් පද්ධතියක් තියෙන තරඟයට වගේ ශබ්ද පූජා පවත්වන, ලවුඩ්ස්පීකර් ඒවායේ තිබෙන රටක ඒ සියලු සම්පත් යොදාගෙන මිනිස්සු පැය ගණන් හිටවගෙන වැස්සේ අව්වේ තියන්නේ නැතිව මේ වැඩේ කරන්න පුළුවන්.
ගැටළුව තියෙන්නේ ප්‍රමාණවත් එන්නත් සපයා නොගැනිමේ. අනික තමයි කවදත් තමන්ගේ පහසුව ආරක්ෂාව හොයන වසම් සීමා ඉක්මවා යමින් තමන්ට එන්නත් ලබා ගන්නා මිනිස්සු හා හිතවතුන්ට සලකන වැරදි දේශපාලනයෝ.
මාර්ග ව්‍යාපෘති වැනි වසරක් කල් දැම්මා කියලා මුකුත් වෙන්නේ නැති වයාපෘති ටිකක මුදල් යොදවලා, ධනපතිගෙන් වහාම සෘජු බද්දක් අය කරලා, දූෂණය කොමිස් කෝවිඩ කාලයටවත් නැවැත්තුවා නම් අවුරුදු 30-60 ත් අතර ලක්ෂ 100 කට අඩු ජනයාට එන්නත් කිරීම මහ ලොකු දෙයක් නොවේ.
දෙවැනි මාත්‍රාව ඊයේ දීපු අංක පිලිවලටම ඒ ඒ විදිහට වෙලාව දීලා එන්න කියන දැන්වීම විතරක් කළාම ඊයෙටත් වඩා හොඳට එදාට මේ දේ කළ හැකියි.
සෞඛ්‍ය කාර්ය මණ්ඩලය ඇතුළු ගමේ නායකත්වය ගත් සැමටයි මේ මල් මිට.
මහින්ද නාමල්
