කොවිඩ් -19 (ඉටුකම) සෞඛ්‍ය හා සමාජ රක්ෂණ අරමුදල වියදම් කළ ආකාරය සම්බන්ධයෙන් පසුගිය මැයි 10 වැනිදා ඉදිරිපත් කළ වාර්තාව හා ඊට පෙර පසුගිය වසරේ නොවැම්බර් 01 වැනිදා ඉදිරිපත් කළ වාර්තාව අතර පරස්පරතා ඇතැයි පෙරටුගාමී සමාජවාදී පක්ෂයේ ප්‍රචාරක ලේකම් දුමින්ද නාගමුව මහතා කියයි.
අද කොළඹ පැවැති මාධ්‍ය හමුවකදී ඒ මහතා කියා සිටියේ නොවැම්බර් මාසයේ ඉදිරිපත් කළ වාර්තාවේ නිරෝධායන ක්‍රියාවලියේ උපදේශන වැඩසටහන් සඳහා මිලියන 24ක් වැය වූ බව දක්වා ඇතත් පසුගිය 10 වැනිදා ඉදිරිපත් කළ වාර්තා වේ එම ශීර්ෂය ඇතුළත්ව නැති බවයි.
එසේම 10 වැනිදා වාර්තාවට අනුව එහි දෙවැනියට වැඩියෙන්ම වැයකර ඇති මුදල වන රුපියල් 67,543,967.00 ක (මිලියන 67කට වැඩි මුදලක්) මුදල වැයකර ඇත්තේ දැනුවත් කිරීමේ වැඩසටහන් වෙනුවෙන් බවද පවසන නාගමුව මහතා එතරම් මුදලක් වැයකර සිදු කළ දැනුවත් කිරීමේ වැඩසටහන් මොනවාදැයි විමසා සිටියි.
එහි දැක්වෙන පරිදි ගිලන් රථ 10ක් ගැනීමට රුපියල් 194,000,000.00 (මිලියන 194කි.) ක් වැය කිරීමට නියමිත බවත්, ඒ අනුව එක් ගිලන් රථයක් වෙනුවෙන් ලක්ෂ 194 ක් වියදම් කිරීමට නියමිතව ඇතැයි ද එතරම් මුදලක් වැයකර ගන්නා ගිලන් රථ මොනවාදැයි ද යනුවෙන්ද ඔහු විමසා සිටී.
නාගමුව මහතා පවසන්නේ සාමාන්‍යයෙන් ටොයොටා වර්ගයට අයත් ගිලන් රථයක ආරම්භක මිලවන්නේ ඇමරිකානු ඩොලර් 40,000ක් බවයි. සාමාන්‍යයෙන් ඒ අනුව එය ලක්ෂ 80ක් බවයි.
බෙන්ස් වර්ගයේ ගිලන් රථයක් ගෙන්නුවද ගිලන් රථයකට වැයවන්නේ රුපියල් ලක්ෂ 130ක් බව ද නාගමුව මහතා පෙන්වාදෙයි.ජනපති මාධ්‍ය අංශය ඉටුකම ගිනුමෙන් වියදම් කළ ආකාරය සම්බන්ධයෙන් නිකුත් කරන ලද මාධ්‍ය නිවේදන දෙක පහත දැක්වේ.
srilankamirror.com
