ඉදිරියේදී ජනමාධ්‍ය හැඳුනුම්පත සහිත කෙනෙකු කිසියම් වරදකට පොලිසිය විසින් අත්අඩංගුවට ගත්විට එය රජයේ ප්‍රවෘත්ති අධ්‍යක්ෂාවරයා වෙත අනිවාර්යෙන් දැන්විය යුතු බව ජනාමාධ්‍ය අමාත්‍ය ඩලස් අලහප්පෙරුම මහතා පොලිස්පතිවරයාට දැනුම් දී තිබේ.
මේ බව අනාවරණය වූයේ පසුගියදා (30 ) පස්වරුවේ ජනමාධ්‍ය අමාත්‍යවරයා කර්තෘ සංසඳය හමුවූ අවස්ථාවේදීය.
බන්දුල ගුණවර්ධන අමාත්‍යවරයාගේ පැමිණිලක් මත ආරම්භ කළ විමර්ශනයකට අදාළව කර්තෘවරුන් දෙදෙනෙකු ඇතුළු මාධ්‍යවේදීන් පිරිසක් අපරාධ පරීක්ෂණ දෙපාර්තමේන්තුවට(CID) කැඳවීමට දැනුම්දීම් කිරීම පිළිබඳව පසුගිය දින කිහිපයේම පුළුල් සංවාදයක් ඇතිවී තිබුණි.
මේ සම්බන්ධයෙන් ඊයේ කර්තෘ සංසදය හමුවූ අවස්ථාවේ ජනමාධ්‍ය අමාත්‍ය ඩලස් අගහප්පෙරුම මහතා කියා සිටියේ මාධ්‍යවේදීන් රහස් පොලිසියට කැඳවීම සහ අපහසුතාවයට පත්වීම වැනි තත්ත්වයන් ඉදිරියේදී කිසිඳු ආකාරයකින් සිදු නොවන බවට සහතික වන බවය.
මේ අතර පසුගිය කාලය පුරාම උතුරේ සහ නැගෙනහිර මාධ්‍යවේදින් මෙන්ම පුරවැසි මාධ්‍යවේදින්ද දැවැත්ත පොලිස් මර්ධනයකට මුහුණ දි තිබුණ අතර අවස්ථා ගණනාවකදි විවිධ විමර්ශණයන්ට භාජනය විමට සිදුව තිබුණි.
උතුරේ සහ නැගෙනහිර මාධ්‍යවේදින් මුහුණ දෙමින් සිටින මේ මර්ධනය දකුණේ බොහොමයක් මාධ්‍ය සංවිධාන පවා කිසිදු සංවේදිකමක් නොදක්වන බව ජේෂ්ඨ මාධ්‍යවේදි සුනන්ද දේශප්‍රිය සිය ට්විටර් ගිණුමේ සටහනක් තබමින් ප්‍රකාශ කොට තිබුණි.
