මහ මැතිවරණයෙන් පසු පළාත් සභා මැතිවරණය පැරණි ක්‍රමයට පැවැත්වීමට කටයුතු කරන බව අගමැති මහින්ද රාජපක්ෂ මහතා පවසයි.ජනාධිපති ගෝඨාභය රාජපක්ෂ මහතා ගෙන යන නව වැඩපිළිවෙළ ඉදිරියට ක්‍රියාත්මක කිරීම සදහා පාර්ලිමේන්තුවේ තුනෙන් දෙකක බලයක් තිබිය යුතු බවත් ඒ සඳහා අවශ්‍ය තුනෙන් දෙකක බලය ලබාදෙන්නැයි ජනතාවගෙන් ඉල්ලා සිටින බවත් අරණායක ප්‍රදේශයේ පැවැති ශ්‍රී ලංකා පොදුජන පෙරමුණේ ජනහමුවකට සහභාගි වෙමින් අගමැති මහින්ද රාජපක්ෂ මහතා කියා සිටි’
තවමත් පළාත් සභා මැතිවරණය පවත්වා නැති බවත් ඒ තුළින් ප්‍රජාතන්ත්‍රවාදී අයිතීන් අහෝසි වී ඇති බවත් හෙතෙම කීවේය.
මේ අතර දේශපාලන නිරික්ෂණයන් පවසා සිටින්නේ එළඹෙන මැතිවරණ ප්‍රතිඵලය ආණ්ඩුක්‍රම ව්‍යවස්ථාව වෙනස් කිරිමට තරම් වන තුනෙන් දෙකක බලයක් පොදු ජන පෙරමුණට ලබාගැනිමට ඇති ඉඩ දැනමත් සිමිත වි තිබිමය.
පසුගියදා මිගමුවේදි පැවැති මධ්‍ය හමුවකට එක් වෙමින් හිටපු රාජ්‍ය ඇමති රංජන් රාමනායක කියා සිටියේ කිසිසේත්ම තුනෙන් දෙකක් පොහොට්ටුවට නොලැබෙන බවය.එමෙන්ම 19 ආණ්ඩු ක්‍රම ව්‍යවස්ථා සංශෝධනය කළ යුතු යැයි කියන පොහොට්ටු නායකයන්ට එය ඔවුන්ද එක්ව සම්මත කර ගත් එකක් බව දැන් අමතකව ගොස් ඇති බවද කියා සිටියේ .

මහ මැතිවරණයට අදාළව නිකුත් කළ සෞඛ්‍ය මාර්ගෝපදේශ වහාම රෙගුලාසි ලෙස ගැසට් කළ යුතු බව මැතිවරණ කොමිසමේ සභාපති මහින්ද දේශප්‍රිය මහතා පවසයි.

සෞඛ්‍ය මාර්ගෝපදේශ නිසි පරිදි බලාත්මක වී නොමැති වීම මැතිවරණ කොමිසම මුහුණ දී ඇති ප්‍රධාන ගැටලුවක් බවයි ඒ මහතා පෙන්වා දෙන්නේ.

මාධ්‍ය වෙත විශේෂ ප්‍රකාශයක් සිදු කරමින් ඒ මහතා මේ බව පැවසීය.

මෙම මාර්ගෝපදේශ සෞඛ්‍ය සේවා අධ්‍යක්ෂ ජනරාල්වරයා විසින් මැතිවරණ කොමිසමට ලබා දී මසකට වැඩි කාලයක් ගත වී තිබුණ ද තවමත් රෙගුලාසි වශයෙන් ගැසට් මගින් ප්‍රකාශයට පත්ව නැති බවත් මේ සම්බන්ධයෙන් වගකිව යුත්තන්ගේ අවධානය යොමු විය යුතු බවත් ඒ මහතා පෙන්වා දෙයි.

පවතින කොවිඩ්-19 වෛරස තත්ත්වය යටතේ ජනතාව නිසි පරිදි ආරක්ෂිත පියවර අනුගමනය නොකිරීම හේතුවෙන් හැකි ඉක්මනින් ඒ සඳහා අවශ්‍ය ක්‍රියාමාර්ග ගතයුතු බව ඒ මහතා පවසයි.

මැතිවරණ රැළිවල ඊට සහභාගී වන පුරවැසියන් මෙන්ම දේශපාලකයින්, අපේක්ෂකයින් හා ඔවුන්ගේ ආධාරකරුවන් ඇතුළු සියලු දෙනා අදාළ සෞඛ්‍ය උපදෙස් නිසි පරිදි අනුගමනය කරන ලෙස ඒ මහතා ඉල්ලා සිටියි.
සැබැවින්ම කඩිනමින් මෙය ගැසට් කළ යුතු වන්නේ බහුතරයක් දේශපාලකයන් මේ ගැන කිසිදු තැකිමක් නොකොට සියළු නීති කඩමින් මැතිවරණ ව්‍යාපාරවල යෙදෙන පසුබිමක් දැනටමත් නිර්මාණය වි තිබිම නිසාය.

මතට ඇබ්බැහි වුවන් සහ ඔවුන්ට සේවා සපයන වැලිකන්ද කන්දකාඩු පුනුරුත්තාපන කදවුරේ සියලූ කාර්ය මණ්ඩලය වහාම ක්‍රියාත්මක වන පරිදි 07 වෙනිදා සිට දින 21 ක කාලයක් එම කදවුරේදිම නිරෝධායනය කිරිමට තිරණය කල බව පොළොන්නරුව ප්‍රාදේශිය සෞඛ්‍ය සේවා අධ්‍යක්ෂ වෛද්‍ය සරත් ජයසිංහ මහතා පවසයි.

ඒ අනුව පුනුරුත්තාපන ලාභින් 474 දෙනෙකු සහ එහි කාර්ය මණඩලය 131 දෙනෙකු ඇතුලූව 605 දෙනෙකු එම කන්දකාඩු පුනුරුත්තාපන කදවුරේදිම අදාල පි.සි.ආර් පරික්ෂණයට ලක්කර නිරෝධායනය කරන බවද ජයසිංහ මහතා වැඩිදුරටත් සදහන් කලේය.

පසුගිය කාලය පුරා විවිධ පලාත් වලින් සහ රටවල් කිහිපයකින් පැමිණි පුද්ගලයින් විශාල පිරිසක් කන්දකාඩු නිරෝධායන මධ්‍යස්ථානයේ දින 14 සහ 21 ක වශයෙන් නිරෝධායන වු අතර ඔවුන් අතරින් කිහිප දෙනෙකු කොවිඩ් 19 වෛරසයට ගොදුරු වි ඇති බවට හදුනා ගැණිනි
ඒ අනුව මෙම ස්ථානයේ රැදිසිටි පුනුරුත්තාපන රැදවියන්ටද මෙම වෛරසය වැලදි ඇත්දැයි පරික්ෂා කිරිම සදහා අදාල පි.සි.ආර් පරික්ෂණ ඉතා කඩිනමින් සිදුකර ඔවුන් දින 21 ක කාලයක් සියලූ පහසුකම් එම ස්ථානයේදිම ලබා දි නිරෝධායනය සිදු කරන බවද පොළොන්නරුව ප්‍රාදේශිය සෞඛ්‍ය සේවා අධ්‍යක්ෂ වෛද්‍ය සරත් ජයසිංහ මහතා පැවසිය.
මෙවන් තත්වයක් මතුව ඇත්තේ කන්දකාඩු පුනරුත්ථාපන කඳවුරේ සිටි එක් රැඳවියෙකුට කොවිඩ් වැළදි ඇති බවට වැලිකඩදි හෙළිවි තිබිමත් නිසාය.

වැලිකඩ බන්ධනාගාරයේ රැඳවියෙකු කොරෝනා ආසාදිතයෙකු බවට තහවුරු කර ගැනීමත් සමග බන්ධනාගාරයේ අමුත්තන් පෙන්වීම දින නියමයක් නොමැතිව තාවකාලිකව නතර කර තිබේ.     වැලිකඩ බන්ධනාගාර අධිකාරීවරයා විසින් මෙම දැනුම්දීම සිදුකර ඇත.   අදාළ ආසාදිත රැඳවියා, කන්දකාඩුවෙහි පිහිටි මත්ද්‍රව්‍යයට ඇබ්බැහිවූවන් පුනරුත්ථාපනය කිරීමේ මධ්‍යස්ථානයේ සිට ජුනි මස 27 වන දින වැලිකඩ බන්ධනාගාරය වෙත මාරු කර එවන ලද රැඳවියෙක් බව වාර්තා වෙයි.  

වැලිකඩ රිමාන්ඩ් බන්ධනාගාරයේ රැඳවියෙකු කොවිඩ් 19 ආසාදිතයෙකු වශයෙන් තවහුරු කර ගෙන ඇති බව සෞඛ්‍ය සේවා අධ්‍යක්ෂ ජනරාල් විශේෂඥ වෛද්‍ය අනිල් ජාසිංහ පවසයි.

මෙම රැඳවියා කන්දකාඩුවෙහි පිහිටි මත්ද්‍රව්‍යයට ඇබ්බැහිවුවන් පුනරුත්ථාපනය කිරීමේ මධ්‍යස්ථානයේ සිට ජුනි මස 27 වන දින වැලිකඩ රිමාන්ඩ් බන්ධනාගාරය වෙත මාරු කර එවන ලද රැඳවියෙකි.

මෙම හඳුනාගත් රෝගියා සම්බන්ධයෙන් සහ අනෙකුත් ආශ්‍රිතයන් පීසීආර් පරීක්ෂණ සහ නිරෝධායන කටයුතු සිදු කරමින් පවතින අතර, මෙම පරීක්ෂණ සඳහා රිමාන්ඩ් බන්ධනාගාර රැඳවියන් සහ බන්ධනාගාර නිලධාරීන් ද බඳුන් කරනු ලබන බව රජයේ ප්‍රවෘත්ති දෙපාර්තමේන්තුවේ අධ්‍යක්ෂ ජනරාල් නාලක කලුවැව නිකුත් කළ නිවේදනයක දැක්වේ.

එම නිවේදනය පහතින් 

2011 ලෝක කුසලාන ක්‍රිකට් තරගාවලිය පවා දුන්බවට හිටපු අමාත්‍ය මහින්දානන්ද විසින් කළ ප්‍රකාශයට එරෙහිව පරීක්ෂණයක් කරන ලෙස ඉල්ලමින්, සමාජවාදී තරුණ සංගමය, save the sports සංවිධානය එක්ව අද

( 06) දින ක්‍රිඩා අමාත්‍යංශය වෙත පැමිණිල්ලක් බාර දෙන ලදී.

එම අවස්ථාවට සමාජවාදි තරුණ සංගමයේ ජාතික සංවිධායක එරංග ගුණසේකර, නීතිඥ සුනිල් වටගල, නීතිඥ සුසන්ත දොඩාවත්ත, නීතිඥ චරිත් ගලහේන, මාධ්‍යවේදී විමල් කැටපේ ආරච්චි, ජාතික ජන බලවේගයේ කොළඹ දිස්තික් අපේක්ෂක සුරේෂ් කරුණාතිලක, දිනේෂ් කුමාර්, හා ප්‍රවීණ ගීත රචක රවී සිරිවර්ධන ඇතුළු පිරිසක් එක්ව සිටියේය.

2011 ලෝක කුසලාන ක්‍රිකට් තරගාවලියේ අවසාන මහා තරගය පාවා දුන්නේ යයි මහින්දානන්ද අලුත්ගමගේ සාවද්‍ය තොරතුරු ඉදිරිපත් කර ඇති බැවින් ඔහුට එරෙහිව 2019 අංක 24 දරණ ක්‍රීඩා වලට සම්බන්ධ වැරදි වැළැක්වීමේ පනත, දණ්ඩ නීති සංග්‍රහය සහ අපරාධ නඩු විධාන සංග්‍රහයේ වගන්ති ප්‍රකාරව ක්‍රියා කරන්නැයි සමාජවාදී තරුණ සංගමයේ ජාතික සංවිධායකවරයා ගොනු කළ එම පැමිණිල්ලෙන් ඉල්ලා තිබේ.

ක්‍රීඩා වැරදි වැළැක්වීමේ පොලිස් විශේෂ විමර්ශන ඒකකයට මෙම පැමිණිල්ල සෘජුව ඉදිරිපත් කළ නොහැකි නිසා ක්‍රීඩා අමාත්‍යාංශය හරහා සාධාරණ විමර්ශනයක් අපේක්ෂා කරන බවත්, ඒ සඳහා යහපත් ප්‍රතිචාරයක් නොලැබුණහොත් ඉදිරි නෛතික ක්‍රියාමාර්ග ගන්නා බවත් සමාජවාදී තරුණ සංගමයේ ජාතික සංවිධායක එරංග ගුණසේකර බීබීසී සිංහල සේවයට කියා සිටියේය.

මේ පිළිබඳ ප්‍රතිචාර දක්වා ඇති හිටපු ක්‍රීඩා අමාත්‍ය මහින්දානන්ද අලුත්ගමගේ සඳහන් කර තිබෙන්නේ නිසි පුද්ගලයන්ගෙන් ප්‍රකාශ සටහන් කර නොගෙන, සාක්ෂි නැතැයි පවසමින් පොලිසිය අදාළ විමර්ශනය අවසන් කර ඇති බවය. තමා මේ සම්බන්ධයෙන් ජූලි 03 ජනාධිපතිවරයා දැනුවත් කළ බව ද මහින්දානන්ද අලුත්ගමගේ පවසා තිබේ.

ක්‍රීඩාවලට සම්බන්ධ වැරදි වැළැක්වීමේ පනත:

සමාජවාදී තරුණ සංගමයේ ජාතික සංවිධායකවරයා ඉදිරිපත් කර ඇති පැමිණිල්ලට 2019 අංක 24 දරණ ක්‍රීඩා වලට සම්බන්ධ වැරදි වැළැක්වීමේ පනතේ 13 වන වගන්තිය සහ 11 ඊ යන වගන්ති ද පදනම් කරගෙන තිබේ.

එම පනතේ 13 වගන්තිය අනුව සාවද්‍ය චෝදනා එල්ල කිරීම වරදකි. එහි මෙලෙස සඳහන් වේ.

“මේ පනතේ 16 වන වගන්තිය යටතේ හෙළිදරව් කරනු ලබන යම් තොරතුරක ඇතුළත් යම් චෝදනාවක අන්තර්ගතය සාවද්‍ය බව දැන දැනම හෝ, ඒ චෝදනාව සත්‍ය නොවන බව විශ්වාස කිරීමට හේතු තිබිය දී ඒ තොරතුර මගින් යම් සාවද්‍ය චෝදනාවක් කරන යම් තැනැත්තෙකු මේ පනත යටතේ වරදක් සිදු කරන අතර, මහේස්ත්‍රාත්වරයෙකු විසින් වරදකරු කරනු ලැබීමේ දී රුපියල් ලක්ෂ එකකට වැඩි නොවන දඩයකට හෝ අවුරුදු තුනක් නොඉක්මවන කාලයක් සඳහා බන්ධනාගාරගත කිරීමකට හෝ ඒ දඩය සහ බන්ධනාගාරගත කිරීම යන දඬුවම් දෙකට ම හෝ යටත් විය යුතුය.”

මේ පනත යටතේ සිදු කරන යම් විමර්ශනයක කාර්යය සඳහා ඒකකය විසින් යම් තොරතුරක්, වාර්තාවක් හෝ ලේඛනයක් සපයන ලෙස හෝ යම් ප්‍රකාශයක් සිදු කරන ලෙස තමාගෙන් ඉල්ලා සිටි විට දැන දැනම සාවද්‍ය, අසම්පූර්ණ හෝ නොමග යවන සුළු තොරතුරක් වාර්තාවක්, ලේඛනයක් හෝ සාවද්‍ය ප්‍රකාශයක් කිරීම වරදක් බව එම පනතේම 11 ඊ වගන්තියේ දැක්වේ.

පොලිස් විමර්ශන අවසන් කිරීමට හේතුව:

හිටපු ක්‍රීඩා අමාත්‍ය මහින්දානන්ද අලුත්ගමගේ මාධ්‍ය ඔස්සේ කළ හෙළිදරවුවට අදාළ පැමිණිල්ල ජුනි 24 වැනිදා ක්‍රීඩා වැරදි වැළැක්වීමේ විශේෂ පොලිස් ඒකකය විසින් සටහන් කරගෙන තිබුණි.

ඒ අනුව පහත සඳහන් තොරතුරු අනාවරණය කර ගැනීම සඳහා පොලිස් විමර්ශනයක් ආරම්භ විය.

එම විමර්ශනයට අදාළව 2011 ලෝක කුසලාන ක්‍රිකට් තරගාවලිය පැවැත්වීමේ සමයේදී තේරීම් කමිටු සභාපති ලෙස ක්‍රියා කළ අරවින්ද ද සිල්වා, ශ්‍රී ලංකා ක්‍රිකට් කණ්ඩායමේ එවකට නායකයාව සිටි කුමාර සංගක්කාර සහ ශ්‍රී ලංකා කණ්ඩායම නියෝජනය කළ උපුල් තරංග යන අයගෙන් ප්‍රකාශ සටහන්කර ගන්නා ලදි. මහේල ජයවර්ධන කැඳවා තිබුණ ද පසුව ඔහුට එදින නොපැමිණෙන ලෙස දන්වා තිබුණි.

එහෙත් මහේල ජයවර්ධන අදාළ දිනයේ ක්‍රීඩා වැරදි වැළැක්වීමේ විශේෂ පොලිස් ඒකකය හමුවේ පෙනී සිටියේය.


ජූලි 03 වැනිදා අදාළ පොලිස් විමර්ශන අවසන් කළ බව‍ ජ්‍යෙෂ්ඨ පොලිස් අධිකාරී නීතිඥ ජාලිය සේනාරත්න පැවසුවේය.

“ප්‍රකාශ සටහන් කිරීමට අමතරව ලේඛන ගණනාවක් පරික්ෂා කිරීමට කටයුතු කර තිබෙනවා. මේ සියලු සාක්ෂි අනුව තරග පාවාදීමක් ගැන කරුණු අනාවරණය වී නැහැ. ඒ අනුව ක්‍රීඩා විමර්ශන ඒකකය විසින් තීරණය කර තිබෙනවා මේ විමර්ශනය අවසන් කිරීමට,” යනුවෙන් පොලිස් මාධ්‍ය ප්‍රකාශකවරයා සඳහන් කළේය.

පොලිස් මාධ්‍ය ප්‍රකාශකවරයාගේ එම ප්‍රකාශය ද සාක්ෂි ලෙස පදනම් කරගෙන මහින්දානන්ද අලුත්ගමගේට එරෙහිව නීතිමය පියවර ගන්නැයි ක්‍රීඩා අමාත්‍යංශයේ ලේකම්වරයාගෙන් සහ ක්‍රීඩා අධ්‍යක්ෂවරයාගෙන් ඉල්ලා සිටි බව සමාජවාදී තරුණ සංගමයේ ජාතික සංවිධායක එරංග ගුණසේකර කියා සිටියේය.

‘ක්‍රීඩකයෝ සම්බන්ධ නෑ’ -මහින්දානන්ද පුන පුනා කියයි 

පොලිස් විමර්ශන ගැන සැහීමකට පත් නොවූ තමන් ඒ ගැන සොයා බලන්නැයි ජනාධිපතිවරයාගෙන් ඉල්ලා සිටි බව මේ අතර මහින්දානන්ද අලුත්ගමගේ පවසයි.

“මම පැහැදිළිව සඳහන් කළා ක්‍රීඩකයෝ සම්බන්ධ නෑ. තොරතුරු ගන්න ඕනා අය කවුරුන්ද කියලා. තොරතුරු ගත්තේ එවකට තේරීම් කමිටුවේ සභාපතිගෙන් විතරයි. එක්කෙනෙක්ගෙන් කටඋත්තර අරං ලිපි ගොනු වහන්න පුළුවන්ද ? මේ විදියටමයි පොලිසිය පහුගිය කාලේ කළේ. පොලීසිය තමන්ගේ වැරැද්ද වහගන්න වැරැද්ද මගේ පිට දාලා,” යනුවෙන් ඔහු පවසා තිබේ.

එමෙන්ම මේ සම්බන්ධයෙන් ජාත්‍යන්තර ක්‍රිකට් කවුන්සිලය (ICC) ට තොරතුරු ලබා දී ඇතැයි ඔහු පවසා තිබුණි.

සාක්ෂි නැති බව ජාත්‍යන්තර ක්‍රිකට් කවුන්සිලය කියයි:

මේ අතර ජාත්‍යන්තර ක්‍රිකට් කවුන්සිලය (ICC) පවසන්නේ ශ්‍රී ලංකා ක්‍රිකට් කණ්ඩායම විසින් 2011 ක්‍රිකට් ලෝක කුසලානයේ අවසාන මහා තරගය පාවා දුන් බවට එල්ලවන චෝදනා සම්බන්ධයෙන් විමර්ශනයක් පැවැත්වීමට තරම් ප්‍රමාණවත් සාක්ෂි තමන් වෙත ඉදිරිපත් වී නොමැති බවයි.

අදාළ චෝදනාව සම්බන්ධයෙන් අයිසීසී යේ දූෂණ විමර්ශන ඒකකය මූලික සලකා බැලීමක් කළ බව එම ඒකකයේ කළමනාකරු ඇලෙක්ස් මාෂල් නිවේදනයක් නිකුත්කරමින් කියා සිටී.

ශ්‍රී ලංකා ක්‍රීඩා අමාත්‍යවරයා විසින් අදාළ චෝදනාව සම්බන්ධයෙන් ඒ අවස්ථාවේ අයිසීසී වෙත කිසිදු ලිපියක් යැවූ බවට කිසිදු වාර්තාවක් නොමැති බව පවසන ඇලෙක්ස් මාර්ෂල්, අමාත්‍යවරයාගෙන් එවැනි ලිපියක් ලද බවට මතකයක් නැතැයි අයිසීසී ජ්‍යෙෂ්ඨ නිලධාරීන් ද තහවුරු කරන බව සඳහන් කරයි.

(උපුටා ගැනීම් – BBC සිංහල සේවය)මහින්දානන්දගේ ප්‍රකාශයට එරෙහිව පරීක්ෂණයක් කරන්නැයි ඉල්ලමින්, සමාජවාදී තරුණ සංගමයේ ක්‍රියාකාරීන් පිරිසක් ක්‍රිඩා ආමාත්‍යංශය වෙතට..