(7.00 am ) පී.සී.ආර්. පරීක්ෂණ සඳහා රුපියල් 6500ක උපරිම මිලක් නියම කර තිබුණද අනුමැතිය ඇති පෞද්ගලික රෝහල් හතරම අදාළ මිල ඉක්මවා පී.සී.ආර්. පරීක්ෂණ සිදුකරන බවට අනාවරණය වී ඇත.

එසේම පෞද්ගලික මට්ටමින් රෝහල් වෙත පැමිණෙන්නන්ට පීසීආර් පරීක්ෂණ සිදුනොකරන ලෙස නියෝග ලබාදී තිබුණද මේ අතුරින් ඇතැම් රෝහල් එම නියෝග නොතකා Drive thru (‍මෝටර් රථයේ සිටම) පහසුකම පී.සී.ආර්. පරීක්ෂණ සිදුකරමින් සිටීන බව අර්ණ වෙබ් අඩවිය වාර්තා කොට තිබේ

කොවිඩ් වැළැක්වීමේ ජාතික ක්‍රියාන්විත මධ්‍යස්ථානයේ ප්‍රධානී යුද හමුදාපති ලුතිනන් ජෙනරාල් ශවේන්ද්‍ර සිල්වා පසුගියදා පී.සී.ආර්. පරීක්ෂණ සිදුකරන සියලුම රෝහල්වල නියෝජිතයන් කැඳවා පී.සී.ආර්. පරීක්ෂණවල උපරිම මිල රුපියල් 6500කට පවත්වාගෙන යන ලෙසටත් රෝහල් තුළදී පී.සී.ආර්. පරීක්ෂණ සිදුකළ යුත්තේ නේවාසික රෝගීන්ට පමණක් බවට පසුගිය දා උපදෙස් ලබාදු දි තිබුණද අදාළ රෝහල් හතර රුපියල් 12,000, 9000, 8800 සහ 8500 යන මිල ගණන්වලට රෝහලට පැමිණෙන පුද්ගලයන් වෙනුවෙන් පී.සී.ආර්. පරීක්ෂණ කරන බව ‘අරුණ’ විමසීමකදී අනාවරණය වි තිබේ

මීට අමතරව විදේශයන්ගේ සිට පැමිණෙන පුද්ගලයන් වෙනුවෙන් කෙරෙන පී.සී.ආර්. පරීක්ෂණවලදී ගුවන් සේවාව සපයන සමාගම් සමග එක්ව හඳුන්වා දී ඇති පැකේජ ක්‍රමය ඔස්සේ පීසීආර් පරීක්ෂණය වෙනුවෙන් රුපියල් 19000 දක්වා ඉහළ මිල ගණන්ද අය කෙරෙන බවට ‘අරුණ’ සතුව සාක්ෂි පවතිත තවදුරටත් එම පුවතේ සඳහන්ය

මෙම විමර්ශනයේදී එක් පෞද්ගලික රෝහලක නියෝජිතවරියක සිය පී.සී.ආර්. පහසුකම පිළිබඳව මෙසේ පැහැදිලි කළාය.

‘‘ඩ්‍රයිව් තෲ එකේදි හොස්පිට්ල් එකට ඇවිත් වාහනේ ඉඳගෙනම පී.සී.ආර්. කරන්න පුළුවන්. එහෙම නැතිනම් ඕවද ෆෝන් එපොයිමන්ට්ස් දාලා කරන්න පුළුවන්’’

( 6.30 pm ) ආණ්ඩුව ගහපු අලුත්ම බද්ද මෙන්සස් බද්ද බව සමගි ජනබලවේගයේ මාතලේ දිස්ත්‍රික් පාර්ලිමේන්තු මන්ත්‍රීණි රෝහිණී කවිරත්න මහත්මිය අද(24) පාර්ලිමේන්තුවේදී අයවැය විවාදයට එක්වෙමින් පැවසුවාය.
 
“බ්‍රිතාන්‍ය ජාතිකයින් ඇඟ බද්ද ගැහුවා වගේ මේ දැන් 15% ක ‘මෙන්සස් බද්දක්‘ ගහලා, කාන්තාවන්ගෙන් මාස් ශුද්ධියෙනුත් ආදායම් උපයන්න හදනවා. 1848 දී එංගලන්තයේ ටොරින්ටන් ආණ්ඩුකාරයා ඇඟ බද්ද, බලු බද්ද ඇතුළු බදු 7 ක් ගැහුවා.
 
මේ ආණ්ඩුව කාන්තාවන්ගේ ‘මාස් ශුද්ධියට බදු ගහපු ආණ්ඩුවක් ලෙස ඉතිහාසගත වෙනවා”
 
“ලෝකයේ දියුණු රටවල් පාසල් දරුවන්ට, දුප්පතුන්ට, සනීපාරක්ෂකතුවා නොමිලේ ලබා දෙනවා. සහන මිලට ලබා දෙනවා. සෞභාග්‍යයේ ආණ්ඩුව ධනවතුන්ගේ බදු කපලා දැන් කන බොන, දෛනික අවශතාවන්ට බදු ගහනවා. යහපාලන ආණ්ඩුව එදා ‘සනීපාරක්ෂක තුවා සඳහා වූ බද්දෙන් 40% ක් ඉවත් කළා. එයින් විශාල සහනයක් ජනතාවට ලැබුණා.

 දැන් ආණ්ඩුව සනීපාරක්ෂක තුවා බද්ද 15% කින් වැඩි කරලා. මේ ආණ්ඩුව මිනිස්සු ගැන හිතන්නේ නැති, යක්ෂ ආණ්ඩුවක් බවට දවසින් දවස පත්වෙමින් තියෙනවා. ආණ්ඩුවේ නව ‘මෙන්සස් බද්ද‘ නිසා පීඩාවට පත් වන්නේ කාන්තාවන් පමණක් නොවෙයි.
 
සෑම පවුලකම කාන්තාවන් කිහිප දෙනෙකු සිටිනවා. සනීපාරක්ෂක තුවා ගන්න බැරිව පාසල් නොයන දරුවෝ ඕනෑ තරම් ඉන්නවා. ඒ දුප්පත්කම නිසයි. සනීපාරක්ෂක තුවා සඳහා පැනවූ නව බද්ද ඉවත් කර ගන්යැයි අපි ආණ්ඩුවට බල කරනවා” යැයි ද රෝහිනී කවිරත්න මන්ත්‍රීවරිය ප්‍රකාශ කළාය.

මේ අතර සමඟි ජනබලවේගයේ පත්කළ මන්ත්‍රීනි ඩයනා ගමගේ මහත්මිය අද (24) පාර්ලිමේන්තුවේදී පෑඩ් පිළිබද ප්‍රශ්ණය ගැන අදහස් දක්වා තිබුණි.

ශ්‍රී ලංකාවේ ජනගහණයෙන් 52% ක් කාන්තාවන් වන බැවින් මෙන්ම විශේෂයෙන් එයට අයිති පාසල් වයසේ දැරියන් පිළිබඳව අවධානය යොමු කරමින් ‘සනීපාරක්‍ෂක තුවා’ අත්‍යඅවශ්‍ය භාණ්ඩයක් බවට පත්කරන ලෙස සමඟි ජනබලවේගයේ පත්කළ මන්ත්‍රීනි ඩයනා ගමගේ මහත්මිය අද (24) පාර්ලිමේන්තුවේදී ඉල්ලා සිටියාය. රජය ‘සනීපාරක්‍ෂක තුවා’ සඳහා 15% ක වැට් බද්ධක් පැනවීමට කටයුතු කිරීම මෙම ඉල්ලාසිටීමට හේතුව බවට පත්විය.

ආණ්ඩුව ඉදිරිපත් කළ 2021 අයවැය පිළිබඳව විවාදයට එක්වෙමින් ඩයනා ගමගේ මහත්මිය වැඩි දුරටත් මෙසේ ද පැවසුවාය.

“සනීපාරක්‍ෂක තුවාවලට 15% ක වැට් බද්දක් ගහලා තියෙනවා. මම ඉල්ලා සිටිනවා ගරු අගමැතිතුමාගෙන් සහ ජනාධිපතිතුමාගෙන් මේක අත්‍යඅවශ්‍ය භාණ්ඩයක් කරන්න කියලා”

“මෙය මානුෂීය සහ සෞඛ්‍ය දෙයක් හැටියට මම කථා කළ යුතුමයි. මේ රටේ ජනගහණයෙන් සියයට 52 ක් කාන්තාවන් ඉන්නවා. ඒ කාන්තාවන්ගේ සෞඛ්‍ය ප්‍රශ්නයක් සහ මානුෂීය ප්‍රශ්නයක් වෙලා තියෙනවා”

“ජනගහණයෙන් සියයට 52 ක් කාන්තාවො. අනිත් එක අපේ දැරිවියො”

“මේ ප්‍රශ්නය නිසා පාසල් යන දැරිවියො සියයට 50 ක් පාසල්වලට යන්නෙ නෑ. ඒ නිසා මෙයට අවධානය යොමු කරන්න කියලා මම ඉල්ලා සිටිනවා”

“දූවරුන් සියයට 50 ක් හැම මාසයකම පාසල් යන්නේ නෑ. මුදල් ඇමතිතුමා අද මෙතන ඉන්නවා. මම හිතනවා එතුමා අවධානය යොමු කරයි කියලා” යැයි මන්ත්‍රීවරිය වැඩි දුරටත් පැවසුවාය.

මුලාශ්‍රය – ලංකාදිප

රක්ෂිත බන්ධනාගාර ගත කර සිටින පාර්ලිමේන්තු මන්ත්‍රී සිවනේසතුරෙයි චන්ද්‍රකාන්තන් හට ඇප ලබාදි තිබේ.
මඩකලපුව මහාධිකරණය විසින් අද මන්ත්‍රීවරයාව රුපියල් ලක්ෂය බැගින් වූ ශරීර ඇප දෙකක් මත මුදා හරින ලෙසයි නියෝග කර තිබුණි

2005 වර්ෂයේදී හිටපු පාර්ලිමේන්තු මන්ත්‍රී ජෝසප් පරරාජසිංහම් ඝාතනය කිරීමේ චෝදනාවට සිවනේසතුරෙයි චන්ද්‍රකාන්තන් හෙවත් පිල්ලෙයාන් රක්ෂිත බන්ධනාගාර ගත කර සිටි අතර මේ සමග එම සිද්ධිය සම්බන්ධයෙන් අත්අඩංගුවේ පසුවූ තවත් සැකකරුවන් 05 දෙනෙකු හට ද ඇප ලබාදී ඇත.
මේ අතර පසුගිය දා දෙමළ ජාතික සන්ධානයේ මන්ත්‍රි එම් සුමන්තිරන් මහතා පාර්ලිමේත්තුවේදි මතුකර තිබුනේ බන්ධනාගාරගතව සිටින පිල්ලෙයාන් මඩකලපුවේ විවෘත කිරිම් වලට මෙන්ම දිස්ත්‍රික් සම්බන්ධිකරණ කමිටු රැස්විමට සහභාගි වි ඇත්තේ කෙසේදැයි කියාය
කතානායක ඉල්ලිම මත පාර්ලිමේන්තුවට පැමිණිට අවසර තිබුණද අනෙක් ඒවාට අවසර නැතැයි සුමන්තිරන් මන්ත්‍රිවරයා මෙහිදි මතුකර තිබුණි

මුලාශ්‍රය -newswire.lk

( 8.30 am ) සෞඛ්‍ය අමාත්‍යාංශයේ වෛද්‍ය සැපයුම් අංශයේ සේවය කරන සේවකයන් හයදෙනකුට කොවිඩ් 19 වයිරසය ආසාදනය වීම නිසා ඖෂධ බෙදාහැරීමේ කටයුතුවලට බලපෑම් ඇති වී තිබෙන බව “අරුණ” පුවත්පත වාර්තා කර තිබේ

දිවයින පුරා සියලුම ​රෝහල්වලට ඖෂධ හා වෛද්‍ය උපකරණ බෙදාහරින වෛද්‍ය සැපයුම් අංශයේ සියලු සේවකයන් ඊයේ (23 වැනිදා) පී.සී.ආර්. පරීක්ෂාවකට ලක් කර ඇති අතර දිවයිනේ සියලුම රෝහල් සඳහා ඖෂධ ලබාගැනීමට දිනකට වාහන පනහකට ආසන්න සංඛ්‍යාවක් මෙම පරිශ්‍රයට පැමිණෙන බැවින් එම වාහන සීමා කිරීමටද සෞඛ්‍ය අමාත්‍යාංශය තීරණය කර ඇත.

වෛද්‍ය සැපයුම් අංශයෙන් ඖෂධ ලබාගෙන ගිය පළාත් හා දිස්ත්‍රික් රෝහල් කාර්ය මණ්ඩලවලටද රෝගය පැතිර යාමේ අවදානමක්ද මතුව ඇත.

ආසාදිත පුද්ගලයන් පසුගිය සතියේ සිට සේවයේ නියුතුව ඇති බැවින් ඔවුන්ගේ පළමු පෙළ ආසාදිතයන් පී.සී.ආර්. පරීක්ෂාවට ලක්කර රෝහල්ගත කරන බවත් අවශ්‍ය වන්නේ නම් දෙවැනි පෙළ ආශ්‍රිතයන්ද පරීක්ෂාවට ලක්කිරීමට කටයුතු කරන බව අප කළ විමසුමකට පිළිතුරු දෙමින් සෞඛ්‍ය අමාත්‍යාංශයේ ​අතිරේක ලේකම් වෛද්‍ය සුනිල් ද සිල්වා සඳහන් කර තිබේ

(7.30 pm ) ව්‍යාපාරික දිලිත් ජයවීර සභාපතිත්වය දරන ‘ජෝර්ජ් ස්ටුවට් හෙල්ත්’ (George Steuart Health) පෞද්ගලික සමාගමට එරෙහි සිදුකරනලදැයි කියන අපහාසාත්මක ප්‍රකාශ සම්බන්ධයෙන් අධිකරණය විසින් එම්ටීවී හා සිරස නාලිකාවලට වාරණ නියෝගයක් නිකුත්කර ඇත.    ‘එම්ටීවී පුද්ගලික සමාගම’ (MTV Channel Private Limited) එහි ප්‍රධාන ප්‍රවෘත්ති විකාශනය තුලින් ‘ජෝර්ජ් ස්ටුවර්ට් හෙල්ත්’  පුද්ගලික සමාගමට එරෙහිව අපහාසාත්මක ප්‍රවෘත්ති විකාශනය කර ඇතැයි චෝදනා කරමින් ගොනු කර ඇති පැමිණිල්ලක් විභාග කළ කොළඹ දිසා අධිකරණය විසින් එම්ටීවී පුද්ගලික සමාගමට එරෙහිව එම වාරණ නියෝගය නිකුත් කර තිබේ.  

‘ජෝර්ජ් ස්ටුවර්ට් හෙල්ත්’ විසින් ආනයනය කරන ලද කොවිඞ් ප්‍රතිදේහ පරීක්‍ෂණ කට්ටල (rapid antigen test kits) පිළිබඳව සඳහන් කරමින් නොවැම්බර් මස  11, 13, 16 සහ 19 වැනි දිනයන් හි දී සිරස නාලිකාවේ ‘නිව්ස් ෆස්ට්’ මගින් සිදු කරන ලද ප්‍රවෘත්ති වාර්තා කිහිපයක් ගැන පැමිණිල්ලේ සඳහන් වේ.   එමගින් මහජනතාව නොමඟ යැවීමට හා ‘ජෝර්ජ් ස්ටුවර්ට් හෙල්ත් හා ජෝර්ජ් ස්ටුවර්ට් සමාගමේ සභාපතිවරයාට අපහාස කිරීම සඳහා අවස්ථා ගණනාවකදී ද්වේෂ සහගත ලෙස නිර්මාණය කරන ලද, අසත්‍ය කරුණු මත පදනම් වූ ප්‍රවෘත්ති විකාශන කර ඇතැයි පැමිණිලිකාර පාර්ශවය විසින් සිය පැමිණිල්ලේ සඳහන් කර ඇත. 

  ඔවුන් ඉල්ලා ඇති වන්දි මුදල රුපියල්  බිලියන 2 කි.   එම්ටීවී නාලිකාව ප්‍රමුඛ එහි නියෝජිතයින් සහ සේවකයින්  විසින් ‘ජෝර්ජ් ස්ටුවර්ට් හෙල්ත් සමගම’, එහි සභාපති සහ එහි ප්‍රධාන නිලධාරීන් ඕනෑම ආකාරයක අපකීර්තියට පමුණුවීම වළක්වමින් අද (23) දින එම වාරණ නියෝගය නිකුත් කර ඇත.   ”පැමිණිලිකාර පාර්ශවය විශේෂයෙන් ප්‍රකාශ කර ඇත්තේ,  ජෝර්ජ් ස්ටුවර්ට් සහ දෙරණ නාලිකාවේ සභාපති දිලිත් ජයවීර සහ කැපිටල් මහාරාජා සභාපති රාජේන්ද්‍රම් රාජමහේන්ද්‍රන් (කිලී මහාරාජා) නායකත්වය දෙන මාධ්‍ය ආයතන අතර ඇති දිගු කාලින තරගය මෙම ද්වේශ සහගත අමනාපකම් වලට හේතු වී ඇති බවයි.”   පැමිණිලිකාර පාර්ශවය විශේෂයෙන් ප්‍රකාශ කර ඇත්තේ,  ජෝර්ජ් ස්ටුවර්ට් සහ දෙරණ නාලිකාවේ සභාපති දිලිත් ජයවීර සහ කැපිටල් මහාරාජා සභාපති රාජේන්ද්‍රම් රාජමහේන්ද්‍රන් (කිලී මහාරාජා) නායකත්වය දෙන මාධ්‍ය ආයතන අතර ඇති දිගු කාලින තරගය මෙම ද්වේශ සහගත අමනාපකම් වලට හේතු වී ඇති බවයි.   ජනාධිපති නීතිඥ රොමේෂ් ද සිල්වා, නීතිඥ රුවන්ත කුරේ සහ නීතිඥ සනත් විජේගුණවර්දනගේ  උපදෙස් පරිදි නීතිඥ එස්. වසන්තකුමාර් නයිල්ස් ජෝර්ජ් ස්ටුවර්ට් හෙල්ත් පුද්ගලික සමගම වෙනුවෙන් පෙනී සිටියේය.

theleader.lk