මඩකලපුව දිස්ත්‍රික්කයට බලපා ඇති අධික වර්ෂාව සහ තද සුළං හේතුවෙන්  ධිවරයන් මුහුදු යෑමෙන් වැළකි ඇතැයි වාර්තා වෙයි.

මේ නිසා මසුන් ඇල්ලීමේ කටයුතු මුළුමනින්ම අඩාලවි ඇති බව ධිවරයෝ පවසති.

නව කාත්තන්කුඩි එත්තුකාල් පුනොච්චේමුනේ නාවලඩි පුන්නකුඩා ඇතුළු බොහෝ මුහුදු බඩ ප්‍රදේශවල මුහුද රළුවීමෙන් ධිවරයන්ගේ ජීවනෝපාය අහිමිවී ඇත.

ධිවරයින් තම බෝට්ටු ඇතුළු ධිවර උපකරණ වෙරළේ සිට දුර ප්‍රදේශවලට රැගෙන නවතා ඇත. මසුන් අලෙවි කරන ස්ථාන  වසා තිබුණි.
(ලංකාදිප )

නව වසර ආරම්භයේ සිටම ඉන්දීය ධිවරයන් යළිත් මෙරට මුහුදු සීමාව පැන මසුන් මැරීම ආරම්භ කරනු ඇති බවට

අනතුරු අඟවන උතුරේ ධීවරයන් පිරිසක් ඔවුන් අත්අඩංගුවට ගැනීමට මැදිහත් වන ලෙස ශ්‍රී ලංකා නාවික හමුදාවෙන් ඉල්ලමින් විරෝධතාවයක් දියත් කර තිබේ.

පළාත් බද වාර්තාකරුවන් පවසන්නේ ‘මයිලඩි’ ධීවර වරාය ඉදිරිපිටදී වර්ෂාව මධ්‍යයේ දෙසැම්බර් 31 වැනිදා උදෑසන ධීවරයන් විසින් පවත්වන ලද උද්ඝෝෂණය සංවිධානය කර තිබුනේ වලිකාමම් උතුර ධීවර සංගමය විසින් බවයි.

විරෝධතාව දියත් කර තිබුනේ ත්‍රිකුණාමලයේ තෙල් ටැංකි සංකීර්ණය සම්බන්ධයෙන් ශ්‍රී ලංකාව ඉන්දියාව සමග පනස් අවුරුදු ගිවිසුමකට එළැඹීම ප්‍රකාශයට පත්වුණු දවසේමය. ඊට දෙසතිඅකට පෙර ශ්‍රී ලංකාවේ චීන තානාපතිවරයා උතුරේ සංචාරයක යෙදෙමින් ධීවර ජනතාවට මිලියන ගණනක සහනාධාර ලබාදී ඉදිරියේදී උපකාර කරන බවටද පොරොන්දු වී තිබුණි.  

ශ්‍රී ලංකා නාවික හමුදා අත්අඩංගුවේ සිටින තම වෘත්තීය සගයන් නිදහස් කරන ලෙස ඉල්ලා රාමේශ්වරම් ධීවරයන් දෙසැම්බර් 19 දින සිට ආරම්භ කළ  අඛණ්ඩ වර්ජනය අද දිනයේ නවතා ඇති බව පවසන උතුරේ ධීවරයන් පෙන්වා දෙන්නේ 2022 ජනවාරි 3 වැනිදා සිට ඔවුන් යළිත් මෙරට මුහුදු සීමාව ආක්‍රමණය කරනු ඇති බවයි.

විරෝධතාවය අවසානයේදී මාධ්‍යවෙත අදහස් දක්වමින් යාපනය දිස්ත්‍රික් ධීවර සමුපකාර සමිති සංගමයේ උප නායක නාගරාසා වර්ණකුලසිංහම් සදහන් කළේ මෙරට අත්අඩංගුවේ පවතින ඉන්දීය ධිවර යාත්‍රා ආපසු ඉන්දියාවට ලබා නොදෙන බවට ධීවර අමාත්‍යවරයා පසුගියදා ලබා දුන් පොරොන්දුව ඉටු කරනු ඇතැයි ධීවරයන් බලාපොරොත්තු වන බවයි.

අමාත්‍ය ඩග්ලස් දේවානන්ද දෙසැම්බර් 24 වැනිදා යාපනයේ ධීවරයන්ට පොරොන්දු වී තිබුනේ ශ්‍රී ලංකාවේ අත්අඩංගුවේ පවතින ඉන්දීය ධීවරයන්ගේ ට්‍රෝලර් යාත්‍රා සහ ධීවර උපකරණ උතුරේ ධීවරයන්ට ලබා දීමට කටයුතු කරන බවයි.


දකුනු ඉන්දීය විරෝධතා

උතුරේ ධීවර විරෝධතා හමුවේ නැවත ආරම්භ කරන ලද මෙහෙයුම් මගින් ලංකාවේ නාවික හමුදාව විසින් අත්අඩංගුවට ගෙන රඳවා ගෙන සිටින ධීවරයන් නිදහස් කරන ලෙස ඉල්ලා දකුණු ඉන්දීය ධීවරයන්ද පසුගියදා උද්ඝෝෂණයක් දියත් කර තිබුනි.

නාවික හමුදා අත්අඩංගුවේ සිටින තම වෘත්තීය සගයන් නිදහස් කරන ලෙස ඉල්ලා රාමේශ්වරම් ධීවරයන් දෙසැම්බර් 19 සිට අඛණ්ඩ වර්ජයක් අරඹා ඇතැයි ඉන්දීය මාධ්‍ය වාර්තා කර තිබුනි.

තමිල් නාඩු මහ ඇමැති එම්.කේ. ස්ටාලින් ඉන්දීය මධ්‍යම ආණ්ඩුවේ අභ්‍යන්තර කටයුතු ඇමැති එස්.ජෙයශන්කර් වෙත ලිපියක් යොමු කරමින් ඉල්ලා ඇත්තේ  ලංකා නාවික හමුදා අත්අඩංගුවේ පසුවන ඉන්දීය ධීවරයන් 55 දෙනා නිදහස් කර ගැනීමට පියවර ගන්නා ලෙසය.

ශ්‍රී ලංකා නාවික හමුදාව දෙසැම්බර් 21 වැනිදා නිවේදනය කර ඇත්තේ විදෙස් ධීවරයන් විසින් මෙරට මුහුදු සීමාව උල්ලංඝනය කරමින් සිදු කරන ධීවර කටයුතු මැඩපැවැත්වීම සඳහා 2021 දෙසැම්බර් 18,19 සහ 20 දිනයන්හී උතුරු සහ උතුරු මැද නාවික විධානයන් මඟින් සිදු කළ අඛණ්ඩ මෙහෙයුම් මඟින් මෙරට මුහුදු සීමාව තුළ අනවසර ධීවර කටයුතු සිදුකළ ඉන්දීය ට්‍රෝලර් යාත්‍රා 10ක් සහ ඉන්දීය ජාතික ධීවරයන් 68 දෙනෙකු නාවික හමුදා භාරයට ගත් බවයි.

ඉන්දීය ධිවර සංවර්ධන දෙපාර්තමේන්තුව හා එරට නාවික පොලිසිය විසින් ධීවරයන්ට දැඩි ලෙස අවධාරණය කර ඇත්තේ ඉන්දීය මුහුදු සිමා මායිම් පැන මසුන් ඇල්ලීමට ගිය හොත් දැඩි දඩුවම් ලබා දෙන බවය.

මෙරට ඉන්දීය මහ කොමසාරිස් ගෝපාල් බග්ලේ ඉකුත් මාසයේ ඉන්දියාවේ සංචාරය කරමින් ලංකා මුහුදු සීමාව ආක්‍රමණය කොට මසුන් මැරීමට ගිය හොත් ගැටළු මතුවිය හැකි බවට අනතුරු අඟවා තිබිණි.

මුහුදු සිමා පැන එන  ඉන්දියානු ධීවරයන්  මෙරට  මත්ස්‍ය සම්පත කොල්ලකෑම දිගු කලක පටන් උතුරේ ධීවරයන් මුහුණ දෙන බරපතල ගැටළුවකි.

ශ්‍රී ලංකා නාවික හමුදාව එම කොල්ලය වලකා ලන්නට නිසි පියවර නොගන්නා බවට උතුරේ ධීවර සංවිධාන දිගින් දිගටම චෝදනා කර තිබේ.

මේ නිසා පසු ගිය කාලය තුල උතුරේ ධීවරයන්ට සිදුවූ හානියට වන්දි ලෙස රුපියල් මිලියන 400 ක මුදලක් ලබා දෙන ලෙස උතුරේ ධීවරයන් විසින් මෙරට  ඉන්දීය මහකොමසාරිස්වරයා වෙත ඉල්ලීමක් ද කළේය.

මේ අතර උතුරේ තුන් දින සංචාරයක් නිම කරමින් මෙරට චීන තානාපති කී සෙන්හොං පවසා තිබුනේ උතුරේ ධීවර පවුල් 2500ක් සඳහා රුපියල් කෝටි දෙකක් වටිනා ධීවර ආම්පන්න, වියලි ආහාර සහ මුව වැසුම් ලබා දුන් බවයි.
theleader.lk

කිලිනොච්චිය , පරන්තන් මංසන්ධිය අසලදී වෙළඳසැල් සේවකයකු කපාකොටා ඝාතනය කිරීමේ සිද්ධිය සම්බන්ධයෙන් සැකකරුවන් කඩිනමින් අත්අඩංගුවටගෙන නීතිය ක්‍රියාත්මක කරන ලෙස ඉල්ලා ඝාතනයවූ පුද්ගලයාගේ දේහයද රැගෙන කිලිනොච්චිය , ප්‍රදේශවාසීන් යාපනය නුවර ඒ නවය මාර්ගය අවහිරකරමින් අද(04) විරෝධතාවක නිරත වූහ.
පැයකට අධික කාලයක් විරෝධතාකරුවන් යාපනය නුවර එ නවය මාර්ගය පරන්තන් මංසන්ධිය අසලින් අවහිරකොට දේහය සමඟ මාර්ගයේ හිඳගනිමින් විරෝධතාව දැක්වීම හේතුවෙන් රථවාහන ගමනා ගමනයට දැඩි බාධා එල්ලවිය.
මෙම සිද්ධීන් හේතුවෙන් පරන්තන් මංසන්ධිය අසල අනාරක්ෂිත තත්වයක් උද්ගතව ඇති බවට දීර්ඝ කාලයක සිට පොලිසිය දැණුවත් කළද මේ වනතෙක් පියවරක් නොගැනීම හේතුවෙන් මෙම ඝාතනය සිදුවූ බවට විරෝධතාකරුවන් චෝදනා කළේය.

ඝාතනය සිදුවී දින හතරක් ගතවී ඇති බවත් ඝාතනයේ ප්‍රධාන සැකකරුවන් අත්අඩංගුවටගැනීමට නොහැකිවීමෙන් තවමත් ඔවුන් නිදැල්ලේ සිටින බවද විරෝධතාකරුවන් පැවසීය.
විරෝධතාවය පැවැත්වෙන ස්ථානයට පැමිණි කිලිනොච්චිය කොට්ඨාස භාර ජ්‍යෙෂ්ඨ පොලිස් අධිකාරී සී.බී. මැදවල මහතා විරෝධතාකරුවන් අමතා පවසා සිටියේ සිද්ධියට සම්බන්ධ එක් සැකකරුවකු මේ වන විට අත්අඩංගුවටගෙන ඇති අතර පරන්තන් මංසන්ධිය අසල ප්‍රදේශයට කඩිනමින් පොලිස් මුරපොළක් ස්ථාපිත කිරීමට පියවරගන්නා බවට ජ්‍යෙෂ්ඨ පොලිස් අධිකාරීවරයා පොරොන්දුවීමෙන් අනතුරුව විරෝධතාව අවසන් කෙරිණි.

කිලි සිවා