එළඹෙන සර්ව පාක්ෂික රජයක නාමල් රාජපක්ෂට අමාත්‍ය තනතුරක් ලබාදෙනවාට තම සංවිධානය දැඩි ලෙස විරෝධය පලකරන බව අරගලයේ

ක්‍රියාකාරී සංවිධානයක් ලෙස කටයුතු කල Black Cap Movement පවසයි.

එම සංවිධානයේ මාධ්‍ය ප්‍රකාශක බුද්ධි ප්‍රබෝධ කරුණාරත්න විසින් මාධ්‍ය නිවේදනයක් නිකුත් කරමින් එම කාරණය අවධාරණය කර තිබේ.

එම නිවේදනයේ මෙසේද සඳහන් වේ.


ඉදිරියේදි නිර්මාණය වීමට නියමිත සර්වපාක්ෂික හෝ ජාතික ආණ්ඩුවේ ප්‍රබල ඇමතිකමක් තමාට ලබාදෙන ලෙස පාර්ලිමේන්තු මන්ත්‍රී නාමල් රාජපක්ෂ
ඉල්ලා ඇති බවට දේශපාලන සමාජය තුළ මේ වනවිට රාවයක් පැතිරයමින් තිබේ. මේ පිළිබඳව අප සංවිධානයේ දැඩි අවධානය යොමුව ඇත.

රාජපක්ෂ පවුල්වාදයේ අත්තනෝමතික භාවයට එරෙහිව රටේ පැනනැගෙනු ජන අරගලයේ ප්‍රධාන ඉලක්කය වූයේ රාජපක්ෂවාදයෙන් තොර නව පාලනතන්ත්‍රයක් නිර්මාණය කරගැනීමයි.

අරගලයෙන් ජනතාව බලාපොරොත්තු වූයේ පැරණි පොහොට්ටු ආණ්ඩුවම නැවත සළුපිලි අන්දවා කරලියට ගැනීමට නොවේ. රාජපක්ෂවාදයේ පසුගාමීත්වයෙන් තොර රටකි. නමුත් නාමල් රාජපක්ෂ පසුගියදා භූවිද්‍යා සමීක්ෂණ හා පතල් කාර්යාංශයේ ඉහළ පෙළේ නිලධාරීයෙකු පත් කිරීම සදහාද පරිසර අමාත්‍යවරයා වෙත ලිපි දෙකක් මාර්ගයෙන් බලපෑම් කර තිබෙනු අපට නිරීක්ෂණය විය. 

එමෙන්ම දේශපාලන ආරංචි මාර්ග සඳහන් කරන්නේ නාමල් රාජපක්ෂ මන්ත්‍රීවරයා ශ්‍රී ලංකා පොදුජන  පෙරමුණේ ජාතික සංවිධායකවරයා ලෙස පත්කිරීමට ද සූදානමක් ඇති බවකි.

ජනතා මතය පිළිබඳව කිසිඳු සංවේදීත්වයක් නොමැතිව මෙලෙස ජනතාවට කොකා පෙන්වමින් කටයුතු කිරීමට රාජපක්ෂ කාටේලය කටයුතු කරයි නම් ඔවුන්ගේ දේශපාලන ඉරණම පිළිබඳව ඊළඟ මැතිවරණයේදී ජනතාව තීන්දු කරනු ඇත.

එහෙත් ඊට ප්‍රථම ශ්‍රී ලංකාවේ අර්බුදයට විසඳුම් සෙවීම සඳහා ගොඩනගන සර්ව පාක්ෂික ආණ්ඩුව ද නාමල්ලාගේ දේශපාලන සූදුවක් බවට පත්කිරීමට ඉඩ නොදෙන ලෙස සියලු දේශපාලන කණ්ඩායම් වෙතින් අප ඉතා බැරෑරුම්ව ඉල්ලා සිටිමු.

නාමල් රාජපක්ෂලාගේ දේශපාලන ගේම් වලින් අවසානයේ පීඩාවට පත්වන්නේ රටේ අහිංසක ජනතාව වන අතර ඒ සඳහා ඉඩ නොතැබමින් අවිහිංසාවාදී අරගලයක නිරත වූ සියලුම සාමකාමී අරගලකරුවන් බලාපොරොත්තු වූ දේශය ගොඩනැගීම සියලු දේශපාලන ක්‍රියාකාරීන්ගේ උරමත පැටවී ඇති වගකීමක් බව අප විස්වාස කරමු. ”

theleader.lk

දැනට පත් කර ඇති තාවකාලික කැබිනට් මණ්ඩලය වෙනුවට නව අමාත්‍ය මණ්ඩලයක් ලබන සතියේ දී පත් කිරීමට නියමිතව ඇතැයි රජයේ ආරංචි මාර්ග සඳහන් කරන බව ලංකාදිප වෙබ් අඩවිය වාර්තා කර තිබේ.

සර්ව පාක්ෂික ආණ්ඩුවක් පිහිටුවීම සම්බන්ධයෙන් ජනාධිපති රනිල් වික්‍රමසිංහ මහතා සියලු දේශපාලන පක්ෂ සමඟ සාකච්ඡා කර ඇති නමුත්,සර්ව පාක්ෂික ආණ්ඩුව සම්බන්ධයෙන් අවසන් එකඟතාවකට පැමිණ නැති බැවින්,සර්ව පාක්ෂික වැඩපිළිවෙළක් යටතේ නව කැබිනට් මණ්ඩලය පත් කිරීමට බොහෝ දුරට ඉඩ ඇතැයි දැනගන්නට ඇතැයිද එම පුවතේ වැඩිදුරටත් සදහන්ය.

මෙම කැබිනට් මණ්ඩලය පත් කිරීමේදී ශ්‍රී ලංකා පොදුජන පෙරමුණෙන් කැබිනට් අමාත්‍යධුර හිමිවිය යුතු දිස්ත්‍රික් නායකයන්ගේ ලැයිස්තුවක්ද ජනාධිපතිවරයා වෙත ඉදිරිපත් කර ඇතැයි දැනගන්නට ඇත.

ජන අප්‍රසන්නලාටත් ඇමතිකම් ?

වෛද්‍ය රමේෂ් පතිරණ, ප්‍රසන්න රණතුංග , ජනක බණ්ඩාර තෙන්නකෝන් ,,ජොන්ස්ටන් ප්‍රනාන්දු, රෝහිත අබේගුණවර්ධන, සී බී රත්නායක, පවිත්‍රා වන්නිආරච්චි, එස් එම් චන්ද්‍රසේන,නාමල් රාජපක්ෂ, ආචාර්ය බන්දුල ගුණවර්ධන,සනත් නිශාන්ත,කංචන විජේසේකර යන මහත්වරුන්ගේ නම් ඊට ඇතුළත් වී ඇතැයිද දැනගන්නට තිබේ.

සමගි බලවේගයේ මන්ත්‍රීවරුන් කිහිපදෙනකු ද, නව කැබිනට් මණ්ඩල ට ඇතුළත්වීමට නියමිතව ඇති අතර,ලංකා කම්කරු කොංග්‍රසයේ ජීවන් තොන්ඩමන්,ජාතික කොංග්‍රසයේ නායක ඒ එල් එම් අතාවුල්ලා යන මහත්වරුන්ටද අමාත්‍යධුර හිමිවීමට නියමිතව ඇතැයි දැනගන්නට ඇත.

සර්ව පාක්ෂික ආණ්ඩුවක් පිහිටුවීමට නොහැකි වුවහොත් ජාතික ආණ්ඩුවක් පිහිටුවීම සම්බන්ධයෙන් ද ආණ්ඩුව තුළ සාකච්ඡා වෙමින් පවතින බව දැනගන්නට ඇත.

කැබිනට් මණ්ඩලය තිස්දෙනකුගෙන් පමණ සමන්විත වනු ඇතැයි පැවසේ
මුලාශ්‍රය – ලංකාදිප