පෑලියගොඩ නව මැනිං වෙළඳපොළේ සිදුකළ අහඹු පී.සී.ආර් පරීක්ෂණවලින් පුද්ගලයින් 7 දෙනෙකුට කොවිඩ් – 19 වෛරසය ආසාදනය වී ඇති බවට තහවුරු වී තිබේ.
පෑලියගොඩ නගර සීමාව භාර මහජන සෞඛ්‍ය පරීක්ෂක ඩී.එච්.ජී චින්තක මහතා සඳහන් කළේ, පසුගිය 30 වන දින සිදුකළ පී.සී.ආර් පරීක්ෂණවලින් මෙම ආසාදිතයින් හඳුනාගත් බවය.
මේ අතර ගම්පහ දිස්ත්‍රික්කයේ දිවුලපිටිය ප්‍රදේශයෙන් යළිත් කොවිඩ් ආසාදිතයින් වාර්තා වීම ඉහළයමින් වෙමින් පවතී.ඊයේ දිනයේදී පමණක් දිවුලපිටිය ප්‍රදේශයෙන් ආසාදිතයන් 19 දෙනෙකු වාර්තා වී තිබේ.
ඊයේ දිනයේ දී ගම්පහ දිස්ත්‍රික්කයෙන් වාර්තා වූ ආසාදිතයින් 127 දෙනා අතරින් බහුතරය හඳුනාගෙන ඇත්තේ, දිවුලපිටිය, කොටදෙණියාව, පූගොඩ, කඩවත, ගම්පහ නගරය, තිහාරිය හා කැලණිය ප්‍රදේශවලිනි.
මේ වන විට මෙරටින් හඳුනාගෙන ඇති සමස්ථ කොවිඩ් ආසාදිතයන් ගණන 43000 ඉක්මවා තිබේ.
