(NEGOMBO )- මිගමුව දැන් හොරබඩු ජාවාරම්කාරයන්ගේ දැවැන්ත තිප්පොලක් වි ඇති සෙයකි.
මේ ජාවාරම්කාරයෝ කිසිදු බියක් සැකක් නැතිව රු කෝටි ගණන්වල වටිනාකමින් යුතු හොර බඩු මිගමුවේ ගොඩබාති.
ඉන් කියැවෙන්නේ මේ හොරබඩු ජාවරම්කරුවන්ට මිගමුව යනු ආරක්ෂිත තැනකි.
ඒ අනුව ඒ ආරක්ෂිත බව ජාවාරම්කරුවන්ට සකසා දි ඇත්තේ කව්ද ?
මිගමුව අද පාලනය වන්නේ මිගමුව ඉතිහාසයේ හොරබඩු ජාවාරම් සදහා නම් කප් ගැසු පවුලක් විසිනි.අද ඔවුන් ලංකාවේම කළු සල්ලි වලින් විවිධ ව්‍යාපාර කරගෙන යන ප්‍රකෝටිපතියන්ය.
ඒ කළු සල්ලි ව්‍යාපාරික කටයුතු සදහා මුලික වශයෙන්ම මිගමුව තුල අවැසි ඉඩකඩද ඔවුන් පසුගිය කාලය තුල සකසාගෙන ඇතිවාට සැක නැත.රටේ නිතිය සාමය පමණක් නොව නීති විරෝධි ක්‍රියා සිදුනොවිමට වගබලාගත යුතු පොලිසිය පවා අවැසි පරිදි හසුරුවාගන්නට මුලික වශයෙන් කළ යුතුව තිබුන දේවල් මේ කළු සල්ලි ජාවාරම්කාරයන් විසින් සිදුකර ඇතිවාට සැක නැත.
තතු එසේ වු විට රු ප්‍රකෝටි ගණන් වුව වැය කර හොර බඩු ජාවාරම්කාරයෝ බිය සැක නැතිව මිගමුව තුල හැසිරෙති.
පසුගිය දිනක මිගමුවේදි අත්අඩංගුවට ගත් බිඩි තොගයේ වටිනාකම රු ලක්ෂ 120 කි.මේ කාලයක් තිස්සේ නිදැල්ලේ සිදුකර ඇතැයි කියන මේ ජාවරම් පිළිබදව තොරතුරු ජනයා විසින් මිගමුවේ පොලිස් බළධාරින් හට නොදි පොලිස් විශේෂ කාර්ය බලකායට ලබා දෙන්නේ ඇයිද යන්න ගැනද කල්පනා කලයුතුව තිබේ.
ඉන්දියාවේ තමිල්නාඩු ප්‍රාන්තයේ තුත්තිකුඩ් ප්‍රදේශයේ සිට බෝට්ටු මගින් මීගමුව කාමත්චොල වෙරළ තීරයට රැගෙන එන ලද රුපියල් ලක්ෂ 120ක් පමණ වටිනා බීඩි කොල තොගයක් සමග පුද්ගලයන් හය දෙනෙක් පොලිස් විශේෂ කාර්ය බලකා ගොනහේන කඳවුරේ විශේෂ මෙහෙයුම් අංශයේ නිලධාරීන් අත්අඩංගුවට ගෙන ඇතැයි පොලිස් මාධ්‍ය ප්‍රකාශක නියෝජ්‍ය පොලිස්පති අජිත් රෝහණ මහතා පවසා තිබුණි
එම සැකකරුවන් සමග බීඩි කොළ කිලෝ එක්දහස් පන්සියයක් ,කුඩා ලොරි රථ දෙකක් සහ මොටර් රථයක් පොලිස් බාරයට ගෙන තිබුන අතර අත්අඩංගුවට ගත් පුද්ගලයන් කොච්චිකඩේ දෙහිවල සහ කොළඹ පදිංචිකරුවන් බවද මාධ්‍ය ප්‍රකාශකවරයා කියා තිබුණි.
මේ අනුව පෙනි යන එක් පැහැදිලි කරුණක් වන්නේ මිගමුව දැන් ජාවාරම්කරුවන්ගේ හොර බඩු තිප්පොලක් බවට පත්ව ඇති බව නොවේද ?
පසුගිය මාසයේ දි නාවික හමුදාව විසින් මිගමුවේදි අල්ලාගත් තවත් නිති විරෝධි ඉන්දියන් භාණ්ඩ තොගය ගැන navy.lk වෙබ් අඩවිය මෙසේ වාර්තා කොට තිබුණි
නාවික හමුදාව විසින් 2021 අප්‍රේල් 17 සිට 20 දක්වා මීගමුව, මුන්නක්කරේ කළපු ප්‍රදේශයේ, මන්නාරම කුඩිඉරිප්පු සහ පේසාලේ යන ප්‍රදේශයන්හි සිදුකළ විශේෂ සෝදිසි මෙහෙයුම් මඟින් නීති විරෝධී ලෙස මෙරටට රැගෙන ඒමට උත්සාහ කළ වියලි කහ කිලෝග්‍රෑම් 1263 කට අධික තොගයක් සමඟ සැකකරුවන් 05ක් නාවික හමුදා භාරයට ගැනීමට කටයුතු තිබේ
නීති විරෝධී ජාවාරම් කටයුතු මැඩ පැවැත්වීම සඳහා නාවික හමුදාව නිරන්තර අවධානයෙන් යුතුව දිවයින වටා මුහුදු ප්‍රදේශ ආවරණය වන පරිදි සෝදිසි මෙහෙයුම් සිදුකරනු ලබයි. ඒ අනුව, උතුරු මැද නාවික විධානය මඟින් මන්නාරම කුඩිඉරිප්පු ප්‍රදේශයට ඔබ්බෙන් වූ මුහුදු ප්‍රදේශයේ 2021 අප්‍රේල් 19 වන දින සිදුකළ විශේෂ සෝදිසි මෙහෙයුමකදී සැක කටයුතු ඩිංගි යාත්‍රාවක් පරීක්‍ෂා කර එහි උර 15 ක අසුරා තිබූ වියලි කහ කිලෝ 543 ග්‍රෑම් 700 ක් (තෙත බර සහිත), සැකකරුවන් දෙදෙනෙක් (02) සහ එම ඩිංගි යාත්‍රාව නාවික හමුදා භාරයට ගන්නා ලදි. තවද, අප්‍රේල් 20 වන දින පේසාලේ ප්‍රදේශයට ඔබ්බෙන් වූ මුහුදු ප්‍රදේශයේ සිදුකළ තවත් විශේෂ සෝදිසි මෙහෙයුමකදී නාවික මෙහෙයුම් හේතුවෙන් ජාවාරම්කරුවන් විසින් මුහුදට දමන ලද වියලි කහ කිලෝ 258 ග්‍රෑම් 500 ක් සහිත (තෙත බර සහිත) උර 04ක් සමඟ සැකකරුවන් දෙදෙනෙක් සහ ඩිංගි යාත්‍රාවක් නාවික හමුදා භාරයට ගැනීමට කටයුතු කෙරිණි.
එමෙන්ම, බටහිර නාවික විධානය මගින් මීගමුව, මුන්නක්කරේ කළපු ප්‍රදේශයේදී 2021 අප්‍රේල් 17 වන දින සිදුකළ තවත් මෙහෙයුමකදී නවතා තිබූ සැකකටයුතු ඩිංගි යාත්‍රා දෙකක් (02) පරීක්‍ෂාවට ලක්කර එම ඩිංගි යාත්‍රාවන් තුළ උර 14 ක අසුරා සඟවා තිබූ වියලි කහ කිලෝ 461 ග්‍රෑම් 500 ක ප්‍රමාණයක් සමඟ සැකකරුවෙකු (01) නාවික හමුදා භාරයට ගැනීමට සමත් විය.
පවත්නා කොවිඩ් – 19 ව්‍යාප්තිය වැළැක්වීම සඳහා ලබා දී ඇති සෞඛ්‍ය මාර්ගෝපදේශ අනුගමනය කරමින් සිදුකළ මෙ‍ම මෙහෙයුම් මඟින් නාවික හමුදා භාරයට ගත් සැකකරුවන් වයස අවුරුදු 20 ත් 44 ත් අතර වයසේ පසුවන පේසාලේ සහ මීගමුව ප්‍රදේශයන්හි පදිංචිකරුවන් බවට හදුනාගන්නා ලදි. මීගමුව කළපු ප්‍රදේශයේදී නාවික හමුදා භාරයට ගත් සැකකරු, කහ තොගය සහ ඩිංගි යාත්‍රාව ඉදිරි නීතිමය කටයුතු සඳහා කටුනායක රේගු කාර්යාලය වෙත භාර දීමට කටයුතු කෙරිණි. එමෙන්ම, මන්නාරම කුඩිඉරිප්පු සහ පේසාලේ යන ප්‍රදේශයන්හිදී නාවික හමුදා භාරයට ගත් සැකකරුවන් නිරෝධායන ක්‍රියාවලිය සඳහා මන්නාරම මහජන සෞඛ්‍ය පරීක්‍ෂක වෙත භාර දීමට කටයුතු කළ අතර, නාවික හමුදා භාරයට ගත් වියලි කහ තොගය සහ ඩිංගි යාත්‍රා ඉදිරි නීතිමය කටයුතු සඳහා යාපනය රේගු කාර්යාලය වෙත භාර දීමට කටයුතු කෙරිණි.
