කලක පටන් හඳුන් දැව ජාවාරමේ නියැළුණු සිවුදෙනකු දැව කිලෝග්රෑම් 150කට වැඩි ප්‍රමාණයක් බට්ටා රථ දෙකත් සමඟ අත්අඩංගුවට ගත් බව හම්බන්තොට පොලීසිය පවසයි. හම්බන්තොට නාවික හමුදා කඳවුරේ බුද්ධි අංශ නිලධාරීන්ගේ තොරතුරු මත හම්බන්තොට පොලීසියේ නිලධාරීන් ඊයේ (11) දහවල් කාලයේ දී මෙම වැටලීම සිදු කරනු ලැබීය.
වියළි ආහාර තොග ගෙනයන මුවාවෙන් සුක්ෂම ලෙස සඟවා මෙම හඳුන් දැව තොගය අම්බලන්තොට ප්‍රදේශයේ සිට කුඩා ලොරියක් මගින් (බට්ටා වර්ගයේ) රැගෙන ගොස් හම්බන්තොට කටුවැව ප්‍රදේශයේ දී වැලිමඩ ප්‍රදේශයේ සිට පැමිණි තවත් කුඩා ලොරි රථයකට පටවමින් සිටිය දී මෙම වැටලීම සිදු කිරීමට හැකිවූ බවයි පොලිසිය කියා සිටියේ.
අත්අඩංගුවට ගත් සැකකරුවන් වයස අවුරුදු 30ත් 35 ත අතර පුද්ගලයන් වන අතර ඔවුන් තිදෙනකු වැලිමඩ ප්‍රදේශයේ පදිංචිකරුවන් වන අතර අනෙක් සැකකරු අම්බලන්තොට ප්‍රදේශයේ පදිංචිකරුවෙකි. නිලධාරීන් භාරයට ගැනුණු හඳුන් දැව තොගය කිලෝග්රෑම් 158කට වැඩි බරකින් යුක්ත වන අතර එහි වටිනාකම ලක්ෂ 12කට වැඩි බව නිලධාරීහු පවසති.
dinamina.lk
