තම දරුවන් පැහැර ගෙන ගොස් අතුරුදහන් කළ බවට චෝදනා ලබන නාවික හමුදාවේ උසස්ම තනතුර දරන නිලධාරියා ඇතුළු සැකකරුවන් ගලවා ගැනීම
සඳහා කොමිසමක් පිහිටුවා ඇතැයි චෝදනා කරන මව්වරු අපරාධකරුවන්ට සමාව දීමට ජනාධිපතිවරයාට කිසිදු අයිතියක් නැති බව අවධාරණය කරති.
දොළොස් වසරකට අධික කාලයක් යහපාලනය ඇතුළු ආණ්ඩු තුනකින් යුක්තිය නොලද නොනිමි අරගලයක නිරත මෙම මව්වරුන් කොළඹදී මාධ්‍යවේදීන් හමුවේ ශපථ කර සිටියේ දරුවන් ආපසු ලබා දෙන තෙක් තම අරගලය නොනවත්වන බවයි.
දේශපාලන පළිගැනීම් පිළිබඳ සොයා බැලීම සඳහා පිහිටුවා ඇති විශේෂ ජනාධිපති කොමිසම වැරදිකරුවන්ට නිර්දෝෂී වීමට මග පාදන ආයතයනයක් ලෙස හැඳින්වූ ජෙනිෆර් වීරසිංහ මාතාව “ජනාධිපතිතුමාට වරදක් වුනේ නැහැනේ. ජනාධිපතිතුමාටත් පුතෙක් ඉන්නවනේ. එයාට වරදක් වුනේ නැහැනේ. මට තමයි ඒ දේ වුනේ. මම තමයි සමාව දෙන්න ඕනේ,” යි දැඩි ස්වරයෙන් කියා සිටියාය.
අවුරුදු විසිහතරක් වයසැති තම පුතු ජමාල්ඩීන් ඩිලාන් ඇතුළු පිරිමි එකොළහක් පැහැර ගෙන ගොස් අතුරුදහන් කළේ යැයි හිටපු නාවික හමුදා ප්‍රකාශක රියර් අද්මිරාල් ඩි.කේ.පී දසනායකගේ නම සඳහන් කරමින් ජෙනිෆර් වීරසිංහ මාධ්‍ය ඉදිරියේ කියා සිටියේ සිය තරුණ පුතුගේ ඡායාරූපයක්ද ඔසවා පෙන්වමිනි.
“මට නාවික හමුදාවේම සමහර අය ෆෝන් කරලා කියනවා ළමයි දැන් නෑ, ළමයි මරලා කියලා කියනවා. හොඳයි එහෙනම් ලමයින් ගේ ඇටකටු ටික හරි පෙන්වන්න. එතකොට ඩිඑන් ඒ පරීක්ෂණයකින් මට මගේ පුතා අඳුනා ගන්න පුළුවන්” යි නාවික හමුදාවෙන් ඉල්ලා සිටි ඇය “පුළුවන්නම් වින්දිතයන් වෙනුවෙන්ද ජනාධිපති කොමිසමක් දමන්නැයි” ජනාධිපතිවරයාට අභියෝග කළාය.
චූදිත ඉහළ නාවික නිලධාරීන් තම දරුවන් පහර ගැනීම ගැන දැන සිටි බව අධිකරණය හමුවේ ඇති ලියකියවිලිවලින් තහවුරු වන බවද ජෙනිෆර් වීරසිංහ මාතාව වැඩි දුරටත් කියා සිටියාය.
කොළඹ සහ තදාසන්න ප්‍රදේශවලින් සිංහල, දෙමළ හා මුස්ලිම්, වැඩිහිටි හා තරුණ පිරිමි 11 දෙනෙකු පැහැර ගෙන ගොස් ත්‍රිකුණාමලයේ නාවික හමුදා කදවුරේ භූගත කුටියක තබාගෙන වධ දී අතුරුදහන් කළේ යයි නාවික හමුදාවට එරෙහි පරීක්ෂණ ආරම්භ වුනේ වර්තමාන ජනාධිපති ගෝඨාභය රාජපක්ෂ, හිටපු ආරක්ෂක ලේකම්ව සිටි 2008 වසරේදීය.
නාවික හමුදාවේ මෙන්ම ආණ්ඩුවේ ඉහළම තැන්වලින්ද සිදු කරන ලද විවිධ බාධා කිරීම් හා අවහිර කිරීම් මැද රහස් පොලිසිය විසින් කරන ලද දීර්ඝ විමර්ශනයකින් අනතුරුව අද්මිරාල් ඔෆ් ද ෆ්ලිට් පදවිලාභී වසන්ත කරන්නාගොඩ හිටපු නාවික හමුදාපති ඇතුළු 14 දෙනෙකුට චෝදනා 667 යටතේ මහාධිකරණයේ නඩු පවරා තිබේ.
තමන්ට එරෙහිව ත්‍රිපුද්ගල මහාධිකරණයක් හමුවේ නීතිපති දෙපාර්තමේන්තුව විසින් නඩු පවරා ඇත්තේ දේශපාලන වශයෙන් පලිගැනීමට යැයි වසන්ත කරන්නාගොඩ සහ ඩී.කේ.පී. දසනායක ජනාධිපති විසින් කරන ලද පැමිණිලි කොමිසම හමුවේ විභාග වෙමින් පවතී.
ලොක්කන් රැකීම:
ගෝඨාභය රාජපක්ෂ ජනාධිපති වීමෙන් පසු චෝදනා ලත් නාවික හමුදාවේ ලොක්කන් ආරක්ෂා කිරීමේ හා චෝදනා වලින් නිදහස් කිරීමේ වෑයමක නිරත වන්නේයැයි මාධ්‍ය හමුවට එක්ව සිටි අතුරුදහන් වුවන්ගේ පවුල් එකතුවේ සභාපති බ්‍රිටෝ ප්‍රනාන්දු චෝදනා කළේය.
“මේ නඩුවේ විත්තිකාරයෙක්වන වසන්ත කරන්නාගොඩට ශ්‍රේෂ්ඨාධිකරණයෙන් නියෝගයක් දීල තිබියදීත් එයට විරුද්ධව ඇපීල් උසාවි යනවා. ශ්‍රේෂ්ඨාධිකරණයේ තීන්දුව අභියෝගයට ලක් කරනවානම් එතැන යුක්තියක් සාධාරණයක් තිබිය හැකිදැ,” යි නීතිඥ බ්‍රිටෝ ප්‍රනාන්දු වැඩි දුරටත් ප්‍රශ්න කළේය.
චුදිතයන් රාජ්‍ය යාන්ත්‍රණයේම කොටස්කරුවන් බැවින් නීතියේ යුක්තිය, හා සාධාරණත්වය පිලිබඳ දෙගිඩියාවෙන් පසුවන මෙම මව්වරුන් දසමසක් කුස දරා මෙලොවට බිහිකර, උස්මහත් කළ තම දරුවන් අතුරුදහන් කළවුන්ගේ පරම්පරාවන්ට පවා සාප ඉල්ලමින්, ඉකි ගසමින්, වචන පැටලෙමින් අදහස් ප්‍රකාශ කළ අයුරු සිත් කම්පා කරවන සුළු විය.
මේ අපරාධයට ගොදුරු වූයේ කස්තුරිආරච්චිලාගේ ජෝන් රීඩ් හෙවත් ජෝන්, රජීව් නාගනාදන් හෙවත් මල්ලි, ප්‍රදීප් විශ්වනාදන්, මොහොමඩ් සාජිත්, තිලකේශ්වරම් රාමලිංගම්, ජමාල්ඩීන් ඩිලාන්, අමලන් ලියෝන්, රෝෂාන් ලියෝන්, ඇන්ටනි කස්තුරිආරච්චි, කනගරාජා ජෙගන් සහ මොහොමඩ් අලි අන්වර් හෙවත් හාජ්ජියාර් යන විවිධ වයස් කාණ්ඩයන්ට අයත් එකොලොස් දෙනා ය. මේ අතර පිය පුතු සිව් දෙනෙක්ද වෙති.
යැස්මින් සූකා
මේ අතර නාවික පරිශ්‍ර තුලදී 2008-14 කාල වකවානුවේ සිදුකරන ලද බවට චෝදනා කෙරෙන වධහිංසා, අතුරුදහන් කිරීම් සහ මිනීමැරුම් වලට ශ්‍රීලංකා නාවික හමුදාවේ ඉහළම තලවල අණ දෙන්නන් විශාල සංඛ්‍යාවක් සම්බන්ධ බව හෙළි කොට තිබෙන්නේ යැයි සත්‍යය හා යුක්තිය සඳහා වන ජාත්‍යන්තර ව්‍යාපෘතිය (ITJP) 2018 ඔක්තෝබර් 23 නිවේදනයක් නිකුත් කරමින් කියා තිබේ.
ITJP අධ්‍යක්ෂිකා යැස්මින් සූකාගේ එකී ප්‍රකාශය පවසන්නේ 11 දෙනා පැහැර ගැනීමේ නඩු විභාගය ශ්‍රී ලංකාවේ යුක්තිය ජය ගැනීම පිලිබඳ මහා අන්දරය වීමට නියම වී තිබුනත් ඉතා ශෝචනීය ලෙස එය අසාර්ථකත්වයේ සංකේතයක් බවට පත් වී ඇති බවයි.
theleader.lk
