ලෝකයේ බිහිවූ විශිෂ්ටතම යෝකර් පන්දු යවන්නා ලසිත් මාලිංග යැයි ඉන්දීය වේග පන්දු යවන ක්‍රීඩක ජස්ප්‍රිට් බුම්රා පවසා තිබෙන බවට හින්දුස්තාන් ටයිම්ස් පුවත්පත වාර්තා කර තිබේ.
එහිදී ‘මාලිංග කියන්නේ ලොව සිටින හොඳම යෝකර් පන්දු යවන්නා. ඔහු දීර්ඝ කාලයක් තිස්සේ තම වාසිය සඳහා යෝකර් පන්දුව යොදා ගත්තා’ යනුවෙන් බුම්රා පවසා තිබුණි.
බුම්රා සහ මාලිංග 2013 වසරේ පටන් මුම්බායි ඉන්දියන්ස් කණ්ඩායම වෙනුවෙන් වාර 7ක් ක්‍රීඩාකර තිබේ. එම කාලය අතරතුර විවිධ තරගයන් හසුරවන ආකාරය, තරගයක් අතරතුර කෝප නොවන්නේ කෙසේද යන්න, පිතිකරුවෙකු දවා ගැනීම සඳහා සැලසුම් සකස් කරන්නේ කෙසේද වැනි කාරණා පිළිබඳව තමන් මාලිංගගෙන් ඉගෙනගත් බව බුම්රා මින් ඉහතදී හින්දුස්තාන් ටයිම්ස් පුවත්පත වෙත වාර්තා කර තිබුණි.
කෙසේ නමුත් තමන්ට යෝකර් පන්දු යැවීමට මාලිංග පුරුදු නොකළ බවද, ඉන්දීය අංක එකේ වේග පන්දු යවන ක්‍රීඩක ජස්ප්‍රිට් බුම්රා පවසා තිබේ.
