ශ්‍රී ලාංකික ශ්‍රමිකයන්ගේ ආරක්ෂාව, සෞඛ්‍ය සහ රැකවරණය සම්බන්ධව විදේශ කටයුතු අමාත්‍යංශය තානාපති කාර්යාල සමග එක්ව නිරන්තරව ක්‍රියා කරන බව සම කැබිනට් ප්‍රකාශක අමාත්‍ය ආචාර්ය බන්දුල ගුණවර්ධන මහතා පවසයි.
අමාත්‍යවරයා මේ බව ප්‍රකාශ කළේ අද (25) දින රජයේ ප්‍රවෘත්ති දෙපාර්තමේන්තුවේ පැවති කැබිනට් තීරණ දැනුම්දීමේ මාධ්‍ය හමුවේදී අදහස් දක්වමිනි.
එහිදී මේ සම්බන්ධව තවදුරටත් අදහස් දැක්වූ අමාත්‍යවරයා මෙසේද පැවසීය.
විදේශ සම්බන්ධතා පිළිබද අමාත්‍ය දිනේෂ් ගුණවර්ධන මහතා විදේශයන්හි සිටින ශ්‍රී ලාංකිකයන් මෙරටට ගෙන්වා ගැනීම පිළිබදව ඊයේ (24) පැවති කැබිනට් මණ්ඩල රැස්වීමේදී දීර්ඝ පැහැදිලි කිරීමක්
සිදුකළා. මෙරටට නැවත පැමිණීම සදහා තානාපති කාර්යාල වෙත දැනුම් දී ඇත්තේ ඉතා සුළු පිරිසක් බව එහිදී අමාත්‍යවරයා ප්‍රකාශ කළා.
දළ වශයෙන් ලක්ෂ 13කට අධික පිරිසක් විදේශයන්හි සේවයෙහි නිරත වුවත් එයින් 52401ක පිරිසක් පමණක් මෙරටට ඒම සදහා ඉල්ලුම් කර ඇතැයි ද අමාත්‍යවරයා සදහන් කළේය. එයිනුත් දස දහසකට ආසන්න ප්‍රමාණයක් මේ වන විටත් ලංකාවට ගෙන්වමින් සිටින අතර රටවල් 117ක සිටින ශ්‍රී ලාංකිකයින් මෙරටට පැමිණීමට අපේක්ෂාවෙන් සිටින බවද අමාත්‍යවරයා අනාවරණය කළේය. එයින් රටවල් 38ක සිට ශ්‍රී ලාංකිකයින් 9588කට අධික සංඛ්‍යාවක් මෙරටට පැමිණි අතර තවත් රටවල් 10ක සිටින ශ්‍රී ලාංකිකයින් ගෙන්වාගැනීම සදහා ජුනි මස 24 දින සිට ජූලි මස 07 දක්වා ගුවන් ගමන් වාර 10ක් සිදුකිරීමට නියමිතව පවතින බවද පැවසීය.
තවදුරටත් කරුණු පැහැදිලි කළ අමාත්‍යවරයා,
එමෙන්ම මින් පෙර සිදුකළ පරිදි වෙනත් රට වලින් කොළඹ වරායට පැමිණ විදෙස් වලට යාම සදහා නැව් වලට මාරු වීමට ලබාදුන් ඉඩ ප්‍රස්ථාව මේ වන විට නතර කිරීමක් සිදු වනවා. එයට හේතු වී ඇත්තේ එලෙස ශ්‍රී ලංකාවට පැමිණ වෙනත් රට වලට මාරු වීමට පැමිණි බහුතර පිරිස කොවිඩ් ආසාදිතයින් ලෙස මෙරටදී වාර්තා වීමයි. එලෙස විදේශ වලින් පැමිණි බොහෝදෙනා ආසාදිතයින් ලෙස හදුනාගැනීමත් සමග අප රටෙහි රෝහල් පද්ධතියේ පවතින ඉඩකඩ ප්‍රමාණවත් නොවීමේ ගැටලු මතුවිය හැකි බැවින් මෙම වකවානුව තුළ එම තීරණය ගැනීමට සිදුව තිබේ. මෙලෙස පැමිණි බහුතරය කොවිඩ් ආසාදිතයින් වන අතර ඔවුන් නිරෝධායන කටයුතු සදහා මෙන්ම රෝහල් ආදිය සදහා යොමු කිරීමද ඉතා නිවැරදි ලෙස සහ විචක්ෂණශීලී කළමනාකාරීත්වයක් යටතේ සිදුකළ යුතුයි. දීර්ඝ කාලයක් තුළ දේශීය වශයෙන් කෝවිඩ් රෝගියෙකු වාර්තා නොවූ රටෙහි මෙලෙස විදෙස් රට වලින් ගෙන්වා ගැනීම තුළ රෝගීන් හමුවීම ගැටලුකාරී වීමද මෙම තීරණය ගැනීමට තවත් හේතුවක් වූ බවද අමාත්‍යවරයා සදහන් කර සිටියේය.
news.lk
