කෑගල්ලේ ධම්මික බණ්ඩාර මහතා හඳුන්වා දුන් කොරෝනා වෛරසය නසන ඖෂධය පානය කළ පස් දෙනෙකුට එම වෛරසය ආසාදනය වී ඇති බව තහවුරු වී ඇතැයි රජයේ වෛද්‍ය නිලධාරීන්ගේ සංගමය සඳහන් කර තිබුණ බව ශ්‍රිලංකා මිරර් වෙබ් අඩවිය වාර්තා කොට තිබේ
වරකපොල සහ කෑගල්ල ප්‍රදේශවල පදිංචි වයස අවුරුදු 05ක් වූ දරුවකු සහ ඇගේ මව ඇතුළු පස් දෙනෙකු මෙසේ ආසාදිත වී ඇති බව එම සංගමය සංස්කාරක වෛද්‍ය හරිත අලුත්ගේ මහතා පවසයි.
තමන් එම ඖෂධය පානය කළ බව ඔවුන් විසින් සෞඛ්‍යය නිලධාරීන් සමග තොරතුරු හෙළි කර ඇති බවද අදාල ආසාදිතයන් පස් දෙනා මේ වන විට කොරෝනා ප්‍රතිකාර මධ්‍යස්ථාන වලට යොමු කර ඇති බවද ඒ මහතා සඳහන් කළේය.
සෞඛ්‍ය නීති නොතකමින් මෙවන් දේ පසුපස ගොස් ජීවිතය අවදානමක දමා නොගන්නා ලෙස රජයේ වෛද්‍ය නිලධාරීන්ගේ සංගමය විසින් ජනතාවගෙන් ඉල්ලා සිටියි.
මේ අතර පසුගිය කාලය තුල නිරෝධායන නීති උල්ලංඝනය කරමින් දැවැන්ත පෝලිම් මේ ධම්මික පැණිය වෙනුවෙන් කෑගල්ලේ පෙළගැසුණ අයුරු සමාජ මාධ්‍ය විසින් තියුණු විවේචනයකට ලක්කර තිබුණි.
කෙසේ වෙතත් ඒ සියල්ල එසේ වෙද්දි දෙරණ නාලිකාව දිනපතාම ධම්මික පැණිය පිළිබද කතිකාව සිය ප්‍රවෘත්ති විකාශයන් අතරේ ගෙනයමින් සිටි අයුරුද ඉතා පැහැදිලිය.
කෙසේ වෙතත් දැන් ධම්මික පැණියට විද්‍යාවෙන්ම පිළිතුරක් ලැබි තිබේ. ඒ ගැන කියන්නේද රජයේ වෛද්‍ය නිළධාරින්ගේ සංමය විසිනි. ඉතින් දැන්වත් පැණි පෝලිම් නවතිදැයි අප බලා සිටිමු
