රිවස් නැති අලුත් ගමන….
( ජනපති සටහන)
”අයවැයට පහර වදිනවිට දුවගොස් ඊට පිළිතුරු දීම ද රනිල් අලුතින් ඇතිකල සම්ප්‍රදායකි”
ජනපති රනිල් බඩගාන රට දෙපයින් හිටවීමට පෙර දැන් වාඩි කොට තිබෙන ස්වරූපයකි. ඊළඟට දෙපයින් සිටවීම පමණක් නොව හැල්මේ දිවීම අරඹා මීටර් 100 වේගයෙන් දිවීමට පසුබිම තැනිය යුතුමය.
නැතහොත් කොරෝනා වසංගතය, ලොව ආර්ථික අර්බුද, යුක්රේන් යුද්ධය, ආදී බාහිර කරුණු ලඝු කරමින් රටට රිවස් යන්නට නොහැකිය. සෙසු රටවල් අද ඉදිරි ආර්ථික පිමි පනින්නේ ද මේ ලෝක වාතාවරණයන් තුළ බව වටහා ගැනීම අත්‍යවශ්‍යය. ලංකාවට අර්බුදයෙන් ගොඩයාමට ඩො බිලි 05 ක් නැතුව ලතවෙ ද්දී බංගලියන් ඩො බිලි 05 ක් වැයකොට පත්මා පාළම ඉඳිකිරීම ඊට නිදසුනකි.
අද ලෝක තෙල් මිල ඉතා අඩුය. ගෑස් ගල් අඟුරුද මිල අඩුවෙමින් තිබෙන භාණ්ඩය. අත්‍යවශ්‍ය ආහාර හා සෙසු දේද මිල අවමවන පසුබිමක් පවතී. ලංකාවට ඇත්තේ ඉන් ප්‍රයෝජන ගෙන ආනයන සඳහා විදෙස් වත්කම් හිඟවීමේ ගැටලුවය.
ඒ අස්සේ නැති ලෙඩ දාගැනීමට ද අප සමත්ව තිබේ. ඕමානයේ කාන්තා වහල් වෙළෙදාම රටේ කීර්තිය හා කාන්තාවන්ගේ ගෞරවය කෙළෙසූවකි. එය ඉක්මනින් බෙිරා ගන්නට ඇමති මනූෂ හා ආණ්ඩුව ක්‍රියා නොකලහොත් ඔිමාන පමණක් නොව මැද පෙරදිග රැකියා වෙළෙඳ පොළ ටද එය දැඩි බලපෑම් කරනු නියතය. එය තෙල් හා ගෑස් දක්වා පැතිරයාටම් අනතුරක් ද නැත්තේ නොවේ.
ලෝකයේ විවිධ රටවල් හා සංවිධාන ලංකාවේ අර්බුදය හමුවේ ද්විපාර්ශවික සහයෝගීතාවක් පළකල ද IMF සහාය නිෂ්චිතව ලැබෙන පසුබිමක් නිර්මාණය නොවීම ගැටලුකාරීය. චීනය හා ඉන්දියාවේ ණය ප්‍රතිව්‍යුහගත කිරීමේ පමාව ඊට බලපා තිබේ.
එම කඹ ඇදිල්ල ඇදී ගියොත් දෙසැම්බර් හෝ ජනවාරි ලැබීමට තිබූ IMF සහාය ලබන මාර්තු හෝ ඉන් ඔබ්බට පවා තල්ලුවීමේ ඉඩක් පවතී. ලංකාව දැනට ගැටගහගෙන යන පසුබිමක එය සුබවාදී නොවේ. එහෙත් ලංකාවට වසර 10 – 15 ත් අතර ණය ගෙවීමේ සහන කාලයක් හා ණය ප්‍රතිව්‍යුහගත කිරීමේ ඉඩක් ලබාදිය යුතු බවට පැරිස් සමාජය ස්ථාවරයකට පැමිණ තිබෙන බවට ඉන්දියාවේ හින්දුස්ථාන් ටයිම්ස් වෙබ් අඩවිය වාර්තා කොට තිබේ.එය සත්‍යයක් නම් ඉතා සුබවාදී ය.
පාර්ලිමේන්තුවේ ආණ්ඩුවේ හා විපක්ෂයේ සියලු දෙනාටම රට ගැන වගවීමක් හෝ බංකොලොත් රටක අප ජීවත්වෙන බවට හැඟීමක් තිබේදෝයි සිතෙන්නේ සති 03 ක් පුරා පාර්ලිමේන්තුවේ හැසිරෙන හා කතා කරන විලාසය අනුවය.ඔවුන් සුපිරි වාහන වලින් පැමිණ හොඳට සප්පායම්වී මඩගසා ගනිති.සැලූන් එකකට ආණ්ඩුවෙන් මඩ ගැසීම ද විපක්ෂයේ පිරිස ඒ මඩ සේදීමට ද වැයකල කාලය හා ජනතා ධනය ගැන හිතෙනවිට මේ රට තවම යන්නේ කැලේ පාරක බවත් වගකිවයුතු කිසිවෙකු තවම පාඩම් ඉගෙන නැති බවත් තහවුරු වේ.
එහෙත් වෙනත් ජනපතිවරු හෝ අගමැතිලා මුදල් ඇමති ලෙස අයවැය ඉදිරිපත් කොට ඉන්පසු පාර්ලිමේන්තුව පළාතක එන්නේ නැත. ජනපති රනිල් අයවැය දා සිට සෑම දිනකම පාර්ලිමේන්තු පැමිණීමත් ජනපතිකමේ රාජකාරි එහි සිට ක්‍රියාත්මක කිරීමත් පැසසිය යුතු කරුණකි. අයවැයට පහර වදිනවිට දුවගොස් ඊට පිළිතුරු දීම ද රනිල් අලුතින් ඇතිකල සම්ප්‍රදායකි.
එහෙත් බුද්ධාගමේ විවිධ ඉගැන්වීම්, සූත්‍ර,ත්‍රිපිටකය හා වෙනත් ගැඔුරු කරුණු හරහා විපක්ෂයට බණ දෙසන්නට යාමත් විපක්ෂය ඊට ප්‍රතිචාර ලෙස “ප්‍රති බණ දේශනා” වලට යාමත් විහිළුවක් වන තරමටම දුරදිග ගිය බව රටේ බහුතරයේ මතයය. ජනතාවට අවශ්‍ය බයිලා හා බණ සංදර්ශන හෝ මඩ ගසාගන්නා තරඟ නොවේ. රටත් ජනතාවත් අනාගත පරපුරත් පෙළන ගැටලු වලට කඩිනම් විසදුම් බව දියවන්නාවේ සියලු දෙනා වටහා ගැනීම වැදගත්ය.
අශෝක ජයතුංග විසිනි.
news.lk
